|
Nagmamadaling umuwi si Jack (Jeric Raval) pagkatapos mabili ang gamot para sa anak na may
sakit. Nasalubong niya sa daan si Cordoba (Patrick de la Rosa) at mga kasamahang pulis na nakaenkwentro na niya sa welga. Pinigil siya para kunin ang konting perang natitira
sa kanya at tinutukan siya ng baril. Sa kagustuhang makawala ay nakipag-agawan ng baril si Jack, aksidente itong pumutok at tinamaan ang isa sa mga pulis. Dahil dito ay
nakulong si Jack. Sinaktan at pinuwersa siyang paaminin sa krimeng. Itinanggi niya ito at ipinagpilitang alam ng grupo ni Cordoba na wala siyang kasalanan. Makakalaya pa
ba siya? Makakatulong ba ang asawang si Mina (Sharla Tolentino) sa kabila ng pagkamatay ng kanilang anak? Kung ang hepe ng pulisya ay kumakampi sa kanyang mga tauhan, meron pa
ba siyang pag-asa?
Nakaungos lamang nang kaunti ang pelikula sa puntong hindi ito naging malaswa o bastos kahit
na may eksenang pinagsamantalahan si Mina ng Hepe (Dindo Arroya) ng pulisya. Bagamat hindi rin naman iyon maituturing na artistiko o masining na kuha dahil karaniwan din lang.
Ito pa rin ang dating tema ng good guy laban sa bad guy. Maraming ipinakitang eksena ng labanan lalo na sa katapusan ng pelikula kung saan makikita ang iba't ibang stunts. Ginawa ito para maawa ang manonoodsa bida at sa kanyang mga kapanalig: si Mina at ang anak, Ninong Gustin at ang labor leader na
si Ka Pepe. Hindi sila nagtagumpay na kunin ang simpatiya ng manonood dahil hindi kapani-paniwala ang pag-arte ng mga nagsiganap. Pero maganda ang isang subplot ng
pelikula: si Lt. Franco (Dan Fernando) na nautusang mag-imbestiga sa mga sumbong na anomalyang nagaganap sa loob ng pulisya. Sa pagtatangka ng Direktor na si Pong Mercado na
sinupin ang pelikula ay nakaligtaan niyang hubugin ang mga detalye tulad ng magalaw at masamang kuha ng kamera. Halatang amateurish ang kalakhan ng kuha at tila isang
kamera lamang ang ginamit. Tila kasama ito sa mga pelikulang tinatawag na pito-pito dahil minadali.
Bagamat ipinapakita sa Bagansya na hindi maganda ang gawain ng isang pangkat ng mga
pulis– ito ay pinantayan sa pagpapakita ng isang matapat na opisyal na gumagawa ng imbestigasyon tungkol sa nagaganap na anomalya. Ipinakikita rin ang pang-aabuso ng mga
pulis sa posisyon at kapangyarihan, ang walang-pusong pagpapalakad sa mga ospital, panggagahasa, paglalasing at paghihiganti. Ganun pa man, ipinakita rin ang mabubuti at
mapagmahal na mga taong patuloy na tumutulong sa pang-materyal na bagay, moral at tulong pangkaisipan para sa mag-asawa at sa kanilang anak. Makikita ang mga eksenang
inaasahan para sa isang pelikulang aksyon. Ganun pa man hindi matagal ang pagpapakita ng nasusugatan, patayan at madugong eksena.
Laging may mabuti at masama sa daigdig ngunit sa katapusan, laging kabutihan ang magwawagi.
(Date reviewed: July 27, 2001)
|
