|
Nilasing at inudyukan ni Martin (Vic Vargas) ang ina ni Andres (Johnny Delgado) na ipusta at
ipatalo ang pinakamamahal na gym ni Andres. Para mabawi ni Andres ang kanyang gym, ay hinamon siya ni Martin na paglabanin ang kanilang mga anak sa isang boxing bout.
Ngunit ang anak ni Andres na si Andrew (Jeffrey Quizon) ay walang hilig sa boxing kundi sa pagiging Reyna Elena sa santacruzan. Nanghina si Andres at umatras sa usapan ngunit
hindi ang kanyang anak na si Katong (Judy Ann Santos). Siya ang papalit kay Andrew, isang magandang pagkakataong mapansin at mapamahal siya sa kanyang ama. Nagpakumbaba siyang
humingi ng tulong sa isang magaling na trainer na si Paul (Piolo Pascual) na dati niyang crush ngunit ngayon ay lubha niyang kinaiinisan. Kaya kayá ni Katong na pumasok at magtagumpay sa larangan ng sports na panlalaki? At sa kanilang pagsasanay, manumbalik kaya ang pagtingin niya kay Paul?
Ito'y isang istorya ng young love, puno ng mga love-hate gimmicks ni Juday at Piolo na totoong 'kilig-to-death' ng kanilang maraming tagahanga. Ang kwento ay napakasimple at madalas nang gamitin sa mga nakaraang mga pelikula. Ang mga pangunahing artista ay pawang magagaling mula sa mga bata hanggang sa mga beterano lalong-lalo na sina Johnny Delgado at Gloria Romero. Si Jeffrey Quizon, kahit na sa isang supportingrole lamang, ay napakagaling, natural at kapani-paniwala ang pagganap, at masasabing may magandang kinabukasan sa larangan ng sine. Mabilis ang takbo ng istorya at ang diyalogo ay nakakaaliw at makulay ngunit hindi bastos.
Ang pelikula ay nagpapakita muli ng magagandang kaugaliang Pilipino—ang pagmamahal at
kalinga sa pamilya, pagmamalasakit, pagbubuklod at pakikiramay. Pinakita din dito ang pagbibigay at pagsasakripisiyo ng magkapatid at magkasintahan. Sinasabi din dito na ang
isang magulang, bagamat istrikto at kung minsan ay mabigat magsalita, pagmamahal pa rin sa kanyang mga anak ang nangingibabaw. Isa din itong paalala sa mga magulang na ang
anak, maski sino o ano man siya, ay kaloob ng Dios na dapat mahalin at bigyan ng kalinga.
Binabati namin ang lahat ng may kinalaman sa paggawa ng pelikulang ito na delightful at wholesome comedy na para sa pangkalahatang manonood.
(Date reviewed: August 31, 2001)
|
