|
Sawing-palad na nilalang si Drew (Andrew E)—kapos na sa hitsura at isipan, ay kakambal pa
ang kapahamakan. At lalo na kapag siya ay naakit ng babae, disgrasya ang inaabot ng babae, kung kaya't siya ay virgin pa. Nang makilala niya si Angeli (Rica Peralejo),
hindi niya alam na ito ay isang bampira na naghahanap ng isang virginpara maging ganap ang kanyang pagkabampira. Pagdating ng 21 anyos, ang isang bampira ay mamamatay
kapag hindi siya makakahigop ng dugo ng isang birheng lalaki. Ngunit sa kanilang pagtatagpo, na-in love si Drew at si Angeli sa isa't isa.
Muli na namang pinarusahan ang manonood ng isang walang katuturang pelikula, na walang
maipagmamalaki, bagkus ay dapat pa ngang ikahiya. Ito'y isang mala-higanteng slapstick comedy mula sa umpisa hanggang dulo. At dahil sa pagsingit ng slapstick sa bawa't pagkakataon, naging magulo ang plot at
malabo ang pag-uugnay ng ilang eksena. Mayroon namang kakayanan ang mga artistang magpatawa, ngunit masyadong trying hard ang iba, nagiging ekseherado tuloy at hindi kapani-paniwala ang kanilang mga kilos at facial expressions. Tugma ang background music ni
Fabregas sa tema ng pelikula. May isa namang mapupuring eksena sa bandang dulo—ang car-stunts—maganda ang habulan at nakakatawa ang pagkakaluray-luray ng mga
sasakyan.
Sa kabila ng lahat ng ito, umaalingawngaw ang sinehan sa walang humpay na halakhakan at
sigawan. Marahil ay talaga lang naghahanap ang mga tao ng kahit na anong kaligayahan sa gitna ng madilim at malungkot na katayuan ng kanilang buhay. Kung ang layunin ngwriter at producer ay
aliwin ang mga manonood, sila ay nagtagumpay. Ngunit ang kanilang ginamit na mga paraan ay labag sa magandang asal, katulad ng toilet humor at pangungulangot sa
publiko. At higit na labag sa moralidad ang mga jokes, mga kasuotan ng mga babaeng artista, at mga eksena at usapang pawang nakatutok sa sex (na talaga namang pinagpiyestahan ng mga lalaking manonood).
Napakatalino ng Pilipino sa larangan ng pagpapatawa at kayang-kaya nating gumawa ng malilinis
na komedya (tulad ng Bakit di Totohanin halimbawa.) Bakit hindi ito ang ating pagbuhusan ng oras, talino, at pera? Ang Banyo Queen ay hindi naming ipinapayong
panoorin ng bata man o matanda.
(Date reviewed: September 14, 2001)
|
