|
KASIBULAN… mga
hakbang na papalayo sa kadalisayan ng kamusmusan upang mamulat at humarap sa katotohanan ng buhay. Ang kasaysayang ito ay umiikot kay Daisy (Allona Amor), isang nagdadalagang
laki sa hirap sa Isla Sinagtala. Dahil sa angking kagandahan, siya ay inalok na mag-artista na kanya namang tinanggap sa pagnanais na namakaahon sa kahirapan. Malungkot niyang
iniwan ang amang si Temyong (Vic Santos) at ang kasintahang si Jomer (Paolo Rivero) upang makipagsapalaran sa daigdig ng pelikula. Subalit huli nang malaman niyang gagamitin
lamang dito ang kanyang katawan. Ang pinakamasakit sa lahat, siya ay nabuntis ng kasama sa pelikulang si Regis (Diego Salvador), na ayaw panagutan ang pangyayari. Paano
haharapin ni Daisy ang naghihintay na ama't kasintahan?
Hanggang ngayon, hindi rin maiwasan ang mga prodyuser ang pangungumersiyo sa sex para mabili ang kanilang pelikula. Ang kasibulan ay sagana sa hubaran, pre-marital sex,
paninilip at walang humpay na pagtatalik. Ang plot ay karaniwan at mababaw. Mabagal ang takbo ng istorya, at may mga eksenang hindi kailangan sa kuwento. May isang
aspeto ng sinematograpiya na masasabing maganda. Sa isang taga-siyudad, kay sarap panoorin sa pelikula ang mga tanawin sa isang baryo na di pa abot ng makabagong takbo ng
buhay: ang bahay kubo, ang dagat na busog sa biyaya ng Maykapal, naggagandahang bulaklak, ang makulay na pagsikat at paglubog ng araw. Nakatutuwang pagmasdan ang ilang
tradisyong Pilipino sa pelikulang ito na masasabing buhay pa sa mga baryo: ang Santacruzan, ang pakikiramay sa namatayan, bayanihan, family ties na umuudyot at nagpapatibay sa pagbabalik loob ng isang nagkasala. Angkop ang production design sa nasabing kuwento.
Tipikal sa pelikulang Pilipino ang ipakita na ang kalutasan ng problema ay natatagpuan sa
paglalasing, paggamit ng droga, pakikipag-away, pagtuon sa sex, o di kaya'y pagkitil ng buhay. Ang lahat ng nabanggit ay napapaloob sa Kasibulan at sadyang hindi
angkop ang mga ito sa buhay-Kristiyano. Bagama't may mga aral itong sinisikap, ipinamamahagi — katulad ng pagpapatawad, ang pagtanggi sa abortion, pagpapairal
ng disiplina't batas sa lipunan, pagsisising may kaakbay na pagbabago — ang pagsisikap na ito ay tila pilit lamang.
(Date reviewed: June 29, 2001)
|
