|
Nang mamatay ang Tio Jeting ni Manuel (Robin Padilla) noong wedding night nila ng Tia Miling
ni Lynette (Sharon Cuneta), sinumpa ng pamilya ni Manuel ang buong angkan ni Lynette. Ngunit dahil magkababata sila Lynette at Manuel, di maiwasan na sila ay magkausap. Isang
araw ay natuklasan nila na pareho pala sila ng pangarap na magka-pamilya at lumigaya sa piling ng kabiyak. Ang tuwa ni Lynette sa maling pagkakaintindi na nag-propose si Manuel, na matagal na niyang crush mula pa ng high
school. Mabilis na binalita ni Lynette sa kanyang pamilya na ikakasal na sila, sa laking pagtataka ni Manuel at galit naman ng kanyang pamilya. Sa di sinasadyang
pagkakataon ay nalaman ni Lynette na mali pala ang kaniyang akala, na wala palang balak si Manuel na pakasalan siya. Mabilis siyang nagdesisyon na lumuwas ng Maynila upang
makalimot, magbago, at hanapin kung ano talaga ang gusto niyang gawin sa buhay niya.
Napakaganda ang mga kuha sa probinsya: ang kaakit-akit na mga kulay ng kalikasan pati na ang
simpleng pamumuhay ng taong bayan. Pangkaraniwan lang ang istorya at talagang madaling hulaan ang kahihinatnan, ngunit ang mga eksena ng hindi pag-unawaan at tampuhan nina
Lynette at Manuel ay totoong nakatutuwa pa rin. Napakagagaling at wasto sa kani-kanilang papel ang mga nagsiganap. Hindi nagkamali ang Viva Films na pagtambalin muli ang dati
ng matagumpay na tambalan nina Sharon at Robin sa kilig ng kanilang mga fans. Kakaiba talagang kumilos ang mga beteranong artista sampu ng mga supporting cast na dating
mga nagniningning na sina Rosemarie Gil, Marissa Delgado, Amy Austria at iba pa. Kahit medyo mataba at masyadong matrona ang dating ni Sharon sa tabi ng napakakinis na Robin
ngayon, ay natatabunan na ito ng galing ng kanilang arte at chemistry.
Sa gitna ng maingay at magulong mundo ng pelikula, isang tunay na kakaibang aliw ang handog ng
pelikulang ito. Nilalarawan ang simple at mapayapang buhay sa probinsya, ang kasiyahan ng mga tao sa kanilang kinalalagyan at ang kanilang mabababaw ngunit tunay na mga
kaligayahan: Katulad ng pagkakaisa ng pamilya, ang pag-unawa at damayan ng isa't-isa sa oras ng saya o pangangailangan. Nandiyan din ang paglaganap ng hanap-buhay kapag
sineryoso ang sipag at pagtutulungan ng lahat ng miyembro ng pamilya. Ipinamalas din ang mga hindi kanais-nais na eksena katulad ng mabilis na pagkalat ng tsismis, ang
paglipana ng di-magandang katotohanan. Sumobra ang pansin na binigay sa mga kalokohan ng mga kabaklaan na hindi naman nakakatawa o nakakatuwa. Salamat na lang at mahiksi ito
at namamayani pa din ang nakakaaliw na eksenang komiko. Nakakagalak ang nasisinag na malaking pag-asa para sa industriyang ito, na kayang-kaya pa rin nating gumawa ng
pelikulang may kabuluhan at nagbibigay ng malinis na pang-aliw na walang halong seks o kabastusan.
(Date reviewed: November 29, 2001)
|
