|
Isang barkadang teenagers ang nagbabakasyon sa Kaliraya. Sa gitna ng kanilang maligayang paglalaro't biruan, ay lumitaw ang mga ilan nilang problema. Ang lider ng grupo na si Joboy (Marvin Agustin) ay tinawagan ng kanyang ina na dahil sa hindi sila nakakabayad sa apartment, ay pinashe-sheriff na sila. Si Celine (Kristine Hermosa), sa pag-uwi sa probinsya, malaking tuwa ng nakita muli ang kababatang mahal na si Erwin (Jericho Rosales), ngunit ito'y nag-asawa na pala. Nang magdalang-tao si Ola (Desiree del Valle) ay di niya ito maipagtapat sa kanyang boyfriend na si Louie (Onemig Bondoc). Dahil naman sa isang Simeon ay nagkaselosan ang magsyotang Athan (John Pratts) at Faye (Heart Evangelista), ngunit di lang nila matiyak kung sino talaga ang napupusuan ni Simeon—si Faye ba o si Athan? Kaya bang harapin at hanapan ng solusyon ng mga batang ito ang kani-kanilang mga suliranin?
Uma-apaw sa sinehan ang masayang halakhakan ng lahat ng manonood, maging bagets o forgets. At umu-ugong din naman ang pagkilig-to-death ng
mga kabataan, pati na ang mga gurang na fans, tuwing masusulyapan kahit na anino lamang ng crush-ng-bayang si Jericho Rosales. Magagaling ang mga nagsiganap, lalo na
ang mga kabataan na napakanatural ang kilos at diyalogo hindi lang sa kanilang mga kalokohan, kundi pati sa kanilang mga seryosong eksena. Maganda ang mga kuha sa Kaliraya,
isa na namang paraisong maipagmamalaki ng ating bayan.
Nakalulungkot ang makatotohanang mga problema ng ating mga kabataan ngayon na isinalarawan ng
Trip: mga hiwalay na magulang, mga anak ng kabit, ang dalagang-ina, ang may mga hilig sa kapwa lalaki o kapwa babae, at mga pagseselos ng wala namang kadahilanan.
Naipakita din naman dito ang magandang samahan at tulungan ng barkada, pati na ang mga tamang payo na solusyon. Katulad ng pagbibigay ng tulong ni Louie sa kanyang matalik na
kaibigang si Joboy para huwag silang mapaalis sa kanilang tirahan, ang payong huwag ipalaglag ang walang malay na dinadala ni Ola, at ang pakikiusap ni Joboy sa ina ni Louie
na layuan na ang kongresistang sumusustento sa kanila. Ito'y mainam na mapanood ng mga magulang at mga anak, lalo na iyong may mga katulad na dinadalang hirap at kalungkutan
sa buhay. Maganda din itong pagpapaalala na ang buhay sa mundo ay hindi maaarng puro good-time at pagtritrip lamang. Binabati naming lahat na may kinalaman sa kakaibang
pelikulang ito—na kahit walang pinakitang sex o violence ay totoong malaking kasiyahan ang idinulot nito sa maraming dumagsang manonood.
(Date reviewed: November 9, 2001)
|
