|
Si Babes (Joyce Jimenez), rape victim ng sariling ama, ay nag-Japayuki sa Japan at
nagpapadala na lang ng sustento sa mahal niyang nakababatang kapatid na si Jess (Lester Llansang). Dahil pinagaawayan siya ng mga lalake, nagdesisyon si Babes na umuwi na.
Ngunit napinsala siya sa isang aksidente, nangailangan ng plastic surgery, at umuwing bago na ang mukha. Nagtrabaho muli siya sa isang club sa Maynila, kung saan
siya naging no.1 prosti, ang tanging kinababaliwan ng lahat ng mga kalalakihan. Iniregalo si Babes ng isang Congressman sa kanyang pamangkin bilang graduation gift. Pagkatapos
masilip ni Philip (Marcus Madrigal), isa sa barkada ng pamangkin, ang mainit na pagtatalik ng dalawa, ay sumingit ito at nakipagromansa rin kay Babes, at sa sobrang pagkabaliw
sa babae ay niyayang pakasalan ito. Sa akala ni Babes na ito na ang hulog ng langit para sila ni Jess ay mabuhay ng disente, siya'y pumayag naman kaagad. Wala siyang malay na
pa-Saudi na pala si Philip kinabukasan. Dahil walang simpatiya ang mga tiyahin ni Philip kay Babes, nagsimula na dito ang mahaba niyang matinik na kalbaryo.
Ang Kay Galing ay kuwento ng isang sex goddess, hindi dahil siya ay kaakit-akit o sexy, kundi
dahil napakagaling niya sa kama. Maganda sana ang simula, maging ang mga kuha at tugtog, nang ikuwento ni Babes ang buhay niya, lalo na ang diskarte tungkol sa nakakainggit na
pagkakaibigan nila ni Vicky (Ruby Moreno). Ang manonood ay naging sabik sa patutunguhan ng istorya, ngunit nauwi lang sa malaking kabiguan sa isa na namang walang kabuluhang
pelikula na maraming komplikasyon at mga tanong na naghahanap ng kasagutan. Ang mga pangunahing nagsiganap, tulad ni Albert Martinez at Joyce Jimenez,
na tanyag na mga artista, ay magaling ang pagakakaganap sa papel nilang mga sex maniac, ngunit di kaya nasayang ang kanilang mga talino sa ganitong walang katuturang
pelikula?
Hindi kataka-taka na pinahirapan ang Ang Galing na makalusot sa MTRCB. Dito nilarawan ang
pagyurak sa pagkatao ng mga nilalang, at ang pagkawala ng dignidad ng babae at lalake. Ng dahil sa sex, ang lalake ay naging hayop sa kalupitan, at ang babae naman ay
naging mahina at nagpaalipin pa dito. Walang mapisil na kabutihan dito kundi pawang lagim ng pagnanasa. Kung ang pelikula ay malakas ang impluwensya sa manonood, baka wala ng
hanapin pa ang manonood, maging babae o lalake, kundi idiyosa ang magagaling sa kama. Ang magandang huling pananalita bilang pangwakas ay hindi sapat para matakpan ang isang
pelikula na punong-puno ng sex, hubaran, kalaswaan, prostitusyon, sadismo, murahan at iba pa.
(Date reviewed: August 2, 2002)
|
