|
Bilang isang policewoman, maraming pagkakataon na nanganib ang buhay ni Leonora, (Allona
Amor) sa mga kamay ng mga kriminal na kanyang tinutugis. Ang pinakasukdulan ay nang pinatay nila ang kanyang buong pamilya asawa, magulang at kapatid. Ang gumawa nito ay si
Cobraga (Jeffrey Santos) na ibig ipaghiganti ang kamatayan ng kanyang kambal na si Vibora, isang drug lord. Ang massacre na naganap
sa harap mismo ni Leonora ay matinding tumimo sa kanyang katauhan at ipinangako niya na kailangang pagbayaran nila ang nangyari. Paano niya masusukol ang mga bandidong ito? Hindi ba niya bibigyang halaga ang payo ng kanyang kasintahang si Froilan (Raffy Anido)?
Isa itong action flick na may anim na mahahaba at maiinit na bed scenes at kung
titignan ang kabuuan ng kuwento, hindi naman kailangang isama ang mga ganitong eksena. Simple lang ang dahilan ng estilong ito: pang-akit sa mga manonood na kalalakihan ang sex scenes lalo
na sa presensya ni Allona Amor! At upang makalusot sa "gunting" ang sex at karahasan, sinamahan ng mga rural scenes na pangpa-kalma kung ikaw ay humihingal na sa
panonood! Masaydong magalaw ang kamera, hindi maiwasang mahilo o sumakit ang ulo ng manonood. Sa kuwento, si Allona ay super galing sa kanyang pakikipaglaban sa mga bandidong
kaaway barilan, suntukan, karate, habulan para siyang pinagsamang FPJ at Jess Lapid na hindi nasusugatan, hindi tinatamaan ng bala o nagagalusan man lang. At take note, nakipagsagupaan siya na nakahubad!
Walang karapatan ang policewoman na si Leonora na ilagay ang batas sa kanyang mga kamay,
lalo na kung ang motibo niya ay ang ipaghiganti ang kanyang mga minamahal. Ang galit na umiiral sa kanya ay pagnanais pumatay at maghiganti. Kailangan pa bang i-torture ang
mga maysala bago sila patayin? Dapat ba silang patayin kaagad o puwede namang dumaan sa proseso ng hustisya? Tama bang isalang ang kalinisan ng iyong katawan upang
makapaghiganti? Kailangan pa bang idamay ang mga inosente tulad ng buntis na si Ester? Ipinakita sa pelikula ang isang aspeto ng buhay-pulis na hindi nagbibigay ng tamang
hustisya at nagpalaganap ng kapayapaan. Ito ba ang tunay na larawan ng kasalukuyang police force natin na nais na ipakita sa manonood? Paano natin maigagalang ang mga
pulis kung ito ang isinasaad na mensahe? Bakit hindi natin ipakita ang kanilang mga kabayanihan at pagmamahal sa kanilang katungkulan at paggalang sa human rights ng iba?
(Date reviewed: February 15, 2002)
|
