|
Isang marangya at masaganang buhay ang nakalakihan ng magkakapatid na si Alyssa (Allona Amor),
Mila (Pam Lacson) at JR (Bryan Liwag). Subalit nang mamatay ang kanilang ama at namalagi ng matagal sa ospital ang ina, namuhay sila sa kahirapan. Ibig niyang gumaling ang ina
at patuloy na makapag-aral ang dalawang magkapatid kaya't napilitan ang panganay na si Alyssa na mamasukan bilang sexy dancer sa isang club. Dahil hindi sanay sa
kahirapan, napariwara si Mila at JR na naging dahilan upang magkahiwalay ang tatlo. Samantala, tanggapin pa kaya si Alyssa ng kababatang si Mike (Mon Confiado) kahit nalulong
na siya sa kasalanan? Makakapiling pa kaya niya ang mga kapatid?
Ang "Sapagkat
" ay isang lumang tema ng pelikulang Pilipino na pwede mong ikuwento sa apat
na kataga: Napakayaman, Naghirap, Nagkasala, Nagsisi. Dahil ang apat na "N" ay isa nang gasgas na kuwento ng buhay ng Pilipino, binalutan ito ng direktor ng napakaraming sex scenes upang
kumita sa takilya, isang paulit-ulit na pormula ng mga prodyuser na hindi maasahang gumawa ng quality films. Baguhan ang mga gumanap sa pelikula na marahil ay may
ibubuga kung makasining sana ang pagdidiribe sa kanila at hindi typecasted sa malaswang kuwento. Mayroon bang maipagmamalaki ang pelikula sa bahaging teknikal?
Ang maaari lang banggitin ay ang mga pahapyaw na eksena ng tanawin sa probinsya!
Isang tipikal na buhay Pilipino ang inilalahad ng "Sapagkat
" isang pelikulang nakasentro sa family life. Maganda
ang tinalakay na kuwento pero hindi binigyan diin ang nararapat na solusyon sa hirap na dinanas ng bawat tauhan ng kuwento. Mayroong pagsisisi at pagpapatawad sa bandang huli
subalit natabunan ang mensaheng ito ng namumukod na sensuality sa kuwento. Totoong walang perpektong pamilya dahil maraming pagsubok sa buhay. Subalit ang kahirapan ay
hindi nalulutas sa pamamagitan ng paglusong sa putikan upang doon hanapin ang solusyon. Ang pag-asa ay laging ipinagkakaloob ng Diyos at ang wastong lunas sa ating kahirapan
ay nakasalalay sa ating tamang pagharap sa pagsubok at pagtayo kapag tayo ay nadapa. Hindi ba't puwede namang maiwasan ang malulong sa droga, ang maging isang prostitute, ang
makipagtalik sa mga homosexuals, ang pre-marital sex at ang pamamaraan ng euthanasia?
(Date reviewed: January 11, 2002)
|
