|
Sa pelikulang Prosti, bugaw si Nonoy (Jay Manalo) sa "casa" ni Xedes (Racquel
Villavicencio). Dito niya nakilala si Ditas (Aubrey Miles) isa sa mga babae sa "boarding house" ni Xedes. Mahalaga si Ditas kay Xedes at "reserbado na kay
Gov" pagkat ito diumano'y "donselya" o wala pang karanasan sa sex. Pinagnasaan ni Nonoy ang dalaga hanggang sila'y nagkarelasyon at ginusto na niyang ilayo ang babae
sa trabahong iyon. Sapagka't bawal sa casa ang magkarelasyon ang bugaw at babae, pinalayas ni Xedes si Nonoy nang mahantad ang kanilang lihim. Sa
kawalang pag-asa ni Nonoy sa sinapit na kapalaran, nagbalik ito kay Xedes upang makiusap na papasuking muli sa casa, ngunit siya'y nabigo.
Nag-away ang dalawa, nanaig ang karahasan at nauwi ito sa pagkamatay ng isa sa kanila.
Kapuna-puna na pinag-ukulan ng panahon ang paggawa ng Prosti: may plano at hindi pangkaraniwan
ang mga anggulo ng kamera, ma-drama ang lighting, angkop ang tugtugin, kapani-paniwala ang mga tauhan pagkat bagay sa kanilang mga papel ang mga artistang gumanap.
Heto naman ang mga kapintasan: Bagama't may istoryang matatawag, sanga-sanga ang plot at hindi gasinong makinis ang takbo ng Prosti. Bagama't nagsikap na gawing realistic o
makatotohanan ang kuwento, may mga kalabisan ito na nakasisira sa kabuuan ng pelikula, tulad ng dialogue na sagad sa kabulgaran, o kaya'y ng mga sex scenes na
nakakabagot na sa haba.
Gawa ng mga kalabisang ito, magtataka tuloy ang manonood kung gusto ba talaga ng Prosti na magsalarawan ng buhay, o gusto lang ba nitong "manguryente" ng mga taong babayad ng limampung-piso para manood ng pinagtagni-tagning retaso ng buhay?
Paano mo masasabing "maganda" ang isang pelikula? Maraming sukatan ng kabuluhan nito.
Isa na rito ay ang "napulot" mong aral man o dunong sa panonood nito.
Paglabas mo ng sinehan masasabi mo bang may natutunan kang bago sa pinanood mo? Natulungan ba nitong patalasin, palawakin o palalimin ang iyong pananaw? Bihira sa mga pelikulang hitik sa "bomba" ang nakapagdaragdag ng kabuluhan sa isipan ng mga manonood; kadalasa'y tila nais lamang nilang "mangiliti" o manggising sa makahayop na damdamin ng tao. Sa Prosti, may nakita ang CINEMA na nawa'y mapuna din ng mga manonood, lalo na ng mga kalalakihan: sa mata ng mga babaeng bayaran, ang parukyano at pera ay iisa. Ang mga customer ng casa ay
binabalatan nang buhay ng mga babaing binibilhan ng aliw. Totoong mag-iimbento ang mga babaeng bayaran ng kung ano-anong istorya upang mahabag ang customer at lakihan ang tip na
ibibigay.
Totooong pagtalikod nila'y hinuhubaran nila ang parukyano at pinagtsitsismisan ito mula sa asim ng hininga nito hanggang hugis ng kanyang ari. Totoong wala awa silang mamintas ng mga parukyano ngunit walang kurap na mambibilog ng mga ulo nito magatasan lamang hanggang kaya nila. Anong uri ng lalaki ang bibili pa ng aliw kung nayuyurakan na ang kanilang pagkatao ng mga prosti?
(Date reviewed: October 4, 2002)
|
