|
Si Abby (Judy Ann Santos) ay isang matagumpay at agresibang advertising executive sa
Maynila, samantalang si Vince ay isang simpleng at sensitibong mang-aawit sa Baguio.
Para kay Abby ang oras ay hudyat ng karera upang magawa sa tamang panahon ang mga plano, subalit kay Vince ang oras ay simula lamang ng maliliit na hakbang patungo kung saan umihip ang pagkakataon. Magtatagpo ang landas nila sa paghahanap ni Abby kay Sabina, ang kanyang matalik na kaibigan at nobya ng kanyang batang kapatid. Tulad ng inaasahan, magbabanggaan ang magkaibang personalidad ng dalawa. Magkakaroon ng mumunting pagkakagalit, nakakakilig na away at mga pagkakataong magkakalapit ang loob ng dalawa. Bagamat marubdob ang mga damdamin nila sa isa't isa, mananatili ang tanong: kaya ba ng isa't isang iwanan ang nakasanayang mundo upang yakapin ang walang katiyakang alternatibo ng iniirog.
Sa kabuuan, napakagaang panoorin ng pelikula dahil sa maayos na produksyon, nakatutuwang mga sundot sa diyalogo, magandang
pagganap ng mga pangunahing tauhan at malinaw na pagkakasalaysay.
Maganda ang pagkakasulat at nakakaaliw ang palitan ng salita nina Abby at Vince lalo nuong nag-aasaran pa lamang sila. Buo rin ang paghubog sa mga tauhan kaya't mahigpit ang naratibo. Kaya nga lang, tila naiipit pa rin ang pelikila sa stereotyping at formula na hulaan-ang-susunod-na-eksena. Naroron pa rin ang labis na pagpiga sa mga eksenang pagkahulog ng loob, paghihiwalayan, at pagkakabati. Kung minsan, gusto mong sumigaw na "tama na", nakuha na namin ang punto"—dahil babad na babad na ang nanonood sa pagluha ng mga tauhan habang tumutugtog ang theme song ng pelikula.
Dalawang bagay ang magandang talakayin sa pelikula. Una ay ang dominanteng tema, ang tungkol sa paninimbang sa
pag-ibig. Higit sa romansa at silakbo ng damdamin, ang isang relasyon—lalo yaong pangmatagalan—ay nakabase rin sa maraming bagay tulad ng pagkakasundo at pagkakatuwang ng
pagkatao, pagkahandang isakripisyo ang pansariling gusto, at pagbibigayan. Kailangang mamatay ang isang bahagi ng sarili upang magkaroon ng puwang yakapin ang isang tao sa
kanyang kabuuan. Kung minsan din, mainam na pursigihin hanapin at buuin nang husto ang sarili upang sa pagpasok sa isang relasyon ay buo at matatag ang pagkatao.
Sa ikalawang banda, may mga kapuna-punang prinsipyo na taliwas. Tila ipinapahiwatig na kapag ang isang tao ay matagumpay at abala sa propesyon—normal at makatwiran na bale-walain niya ang personal na relasyon at mabuting pakikitungo sa kapwa at magkaminsan ay ituring na pampaalis ng tensiyon ang pagniniig (tulad ng katwiran ng boss ni Abby). Nang walang inihahaing paliwanag, ipinapakita ng pelikula na bahagi na ng pagkakalapit ng isang babae at isang lalaki ang pre-marital
sex, at puwede na ring patawarin ang pagtataksil sa kasintahan sa ngalan ng pag-ibig.
(Date Reviewed: 13 January 2006)
|
