|
Sa unang araw ng klase sa
Francesca de Huma University, magpupulupot ang mga landas nina Nathan (Jason Abalos), ang "Mr. Guy" at kaibigan ng lahat, si Indy (Kim Chui) ang "genius girl" na mabigat ang loob
sa mga atleta, MJ (Gerald Anderson), ang MVP ng basketball team na hirap na kumawala sa inaasahan ng kanyang kapatid na player, si Precious (Maja Salvador), ang nagpapaka-sosyal at si Gael (Geoff Eigenmann), ang rebeldeng alagad ng sining. Mapagbibintangan ang limang ito sa isang misteryosong pagkakasakit ng mga basketball players sa araw ng kanilang championship game at iisa-isahin ng Inspektor (Bembol Roco) at ni Nathan ungkatin ang koneksyon ng mga ito sa isa't-isa at sa krimen. Sa banding huli ay malalaman ang tunay na salarin at ang responsibilidad ng bawat isa sa nangyari.
Magaang panoorin ang pelikula dahil maayos ang daloy ng kwento at ng teknikal na aspeto ng
produksyon. Nakatulong din na hinango ang konsepto sa isang komersyal sa telebisyon na makailang ulit nang napanood ng masa, kaya't pamilyar kaagad ang mga ito sa mga
elemento ng pelikula, tulad halimbawa ng paggamit ng tanging kulay upang ipakita ang personalidad at kinabibilangang grupo ng mga estudyante. May kiliti ang naratibo na sinibukang
maging daang krus ng komedya, romansa, musical at teatro. Bilang isang romantic comedy ay hindi mahuhuli ang pelikula at kagigiliwan ito, subalit bilang musical ay medyo may ka-kornihan ang mga kanta at pamamaraang ginamit. Maliban sa pambungad na bahagi, ang mga sumusunod na musical numbers at parang MTV na lamang at di gasinong malikhain.
May mga magagandang aral na mapupulot ang mga manunuod sa istorya. Unang-una ang binigyang
diin ni Inspektor kay Nathan, "It is good to be the nice guy, but it is better to do what is right." Hindi laging mainam ang magmukhang mabait sa iba o magiliw sa kaibigan
kung isasakripisyo naman kung ano ang tama at tuwid. Ipinakita rin na hindi mo man sadya o wala ka mang malisya sa iyong nagawang pagkakamali ay hindi pa rin nawawala ang
pananagutan mo rito. Sa huli, may kaangkop na parusa ang may sala, kahit pinagaan na lamang ito ng pakikibahagi ng kanyang mga kaibigang tinulungan. Ang ikalawang aral ay ang
pagkilala, pagiging tapat at pagmamalaki sa tunay na sarili.
Sapagkat sa kaibuturan ng puso ng tao – kahit gaano man kabigat na ang impluwensya ng iba't ibang tao, kinikimkim na hinanakit, maling akala, at iba pa – nananatili ang dalisay na kabutihan at likas na kagalingan. Magandang halimbawa rito si Pre na inakalang sosyal, mayaman at magarbo lamang, ngunit sa tulong mismo ng grupo ng mga "sosi" sa kanyang eskwela ay namulat siya sa kahaagahan ng pagkakaroon ng kumpyansa sa tunay na sarili, pagsuporta sa kaayusan, pagiging responsable sa mga tungkulin. Mainam panoorin ng pamilya ang pelikula kung hanap nila ay aliw na may magandang mensahe.
(Date Reviewed: 29 September 2006)
|
