|
Ipinakilala sa buong hacienda ni Don Manuel (Eddie Garcia), isang milyonaryo ngunit matandang asendero, si Luisa (Regine Velasquez), ang babaeng nais niyang pakasalan. Ang pagkakaalam ng lahat ay nagbuhat sa isang mayamang angkan at laki sa Amerika si Luisa, subalit "nakaka-amoy" ng pagpapanggap sa dalaga si Gabriel (Robin Padilla), ampon at katiwala ni Don Manuel. Pagkat mahal niya at ayaw niyang malinlang ang lalaking umampon sa kanya, tapatang sinabi ni Gabriel kay Don Manuel ang hinala niya tungkol kay Luisa subalit binale-wala ito ng matanda. Isang araw, gawa ng ilang pangnegosyong problema, kinailangang lumuwas nang biglaan ni Don Manuel sa Maynila. Minabuti ni Don Manuel na ihabilin si Luisa kay Gabriel habang siya'y nasa malayo upang makilala nang lubos ng lalaki ang dalaga at mawala ang mga hinala niya tungkol dito. Di naglaon, may nalaman si Gabriel tungkol sa nakaraan ni Luisa na nagpapatunay na tama ang kanyang hinala.
Dalawang "extremes" sa aspetong teknikal ang pinaghahalo sa pelikulang Till I Met You:
kakornihan at karubduban. Bubuntong-hininga ka na lang at ititirik ang mga mata mo sa kabagot-bagot na tangka nitong mangiliti o magpatawa, sa eksaheradong pag-arte, sa
kanipisan ng pagsasa-tauhan (character development), sa nakakainip na takbo ng istorya na lalo lamang pinababagal ng kababawan ng script. Sa kabilang dako, lalo na sa
ikalawang kahati ng pelikula, gawa ng daloy ng kuwento, nabawasan ang kabaduyan ng pangongomedya, naging marubdob ang pag-arte, nagsikap maging totoo na ang mga tauhan, umayos ang
takbo ng istorya, nagkalaman ang dialogue, at naging maliwanang ang mensahe ng pelikula.
Hindi na mahirap magpikit-mata sa mga kakulangang teknikal ng Tell I Met You
kung ang isasa-alang-alang mo lamang ay ang mabuting balitang isinasaad nito---na higit na mahalaga kaysa pangsariling kasiyahan ang pagiging tapat sa relasyon, ang pagtanaw ng utang-na-loob sa gumawa ng kabutihan sa iyo, ang paghihintay sa tamang panahon upang bigyang-daan ang umuusbong na pag-iibigan, ang pagpaparaya alang-alang sa malayang pagdedesisyon ng isang minamahal. Sa panahong "okay na okay" na sa mga tao ang maging makasarili, idinidiin ng pelikula na may mga bagay pang higit na mahalaga kaysa sa sarili. Sinasabi ng Tell I Met You na hindi dahilan ang masaklap na nakaraan or pagkabata upang tuluyang malulong sa kasawiang palad ang tao; may malaking puwang sa puso ng tao na maaaring tamnan ng punla ng kabutihan tungo sa isang maliwanag na kinabukasan.
(Date Reviewed: 13 October 2006)
|
