|
Sawa na si Faye (Kristine Hermosa) sa pambabae at pandaraya ng kliyente ng kanyang asawang si
Enteng (Vic Sotto) kung kaya't pinalayas niya ito ng bahay.
Matatauhan naman si Enteng at babalik na ng kanilang tahanan para humingi ng tawad sa kabiyak pero mauudlot ito sapagka't lalamunin siya ng lupa, kasama na ang kanyang alalay na si Jose (Jose Manalo). Magsisimula ang mga adbentyur ng dalawa sa pagtakas nila mula sa malabungong dambuhala, hanggang sa "pagluluto" sa kanila ng isang tribong taga-bundok at pagliligtas nila sa isang kawan ng mga nilalang na tila mga kalahi ng mga Ewok. Samantala, ang enkantadang ina naman ni Faye, si Ina Magenta (Giselle Toengi) ay takdang sumagupa sa isang masamang enkantada, si Satana (Bing Loyzaga), sa kaharian ng Engkantasya.
Hindi sa katinuan ng kuwento nakabase ang takbo ng Enteng Kabisote 3,
kaya't humanda kayong mataranta sa takbo ng mga pangyayari. Huwag na kayong magtaka at tila walang tinutumbok ang istorya. Kung hanap ninyo'y kababalaghang gawa ng computer, marami ito, ngunit hindi ito
Harry Potter o Lord of the Rings sa kinis at galing ng pagkakagawa. Huwag na rin kayong maghanap ng husay ng pagganap o matalinong script pagka't hindi rin dito nakasalalay ang tagumpay ng pelikula. Ang
Enteng Kabisote 3 ay para lamang pinahabang Eat Bulaga na nilahukan ng Encantadia---katatawanan at kababalaghan, ang pormula ng pelikulang patok sa panlasa ng
Pinoy, ikinalulungkot man naming itong sabihin.
Kahit na sabihin pang ang Enteng Kabisote 3
ay may masasabing kabuluhan na rin gawa ng pagsasagupa ng kabutihan at kasamaan, malabo pa rin ang mensahe nito dahil nasasapawan ito ng halo-halong slapstick, martial arts na hilaw, at komedyang walang utak. Maaaring magtaka kayo, tulad namin, at nanalo ito bilang Best Picture sa Manila Film Festival 2006,
ngunit kung malalaman ninyo na ang kalakhan (40%) ng sukatan pala ng MFF ay "commercial viability", mauunawaan na ninyo kung bakit dito napunta ang korona ng nagwagi.
Hindi naman sa nakikialam ang CINEMA---nagtatanong lang: Paano kaya aangat ang industriya at sining ng pelikulang Pilipino kung ang batayan ng kahusayan ng pelikula ay ang galing nitong humatak ng pera sa takilya? Gagasta ba kayo ng piangpagurang pera para mabagot sa sinehan? Marami nang mabibili ang pang-sine ninyong 140 pesos: anim na kilong bigas, o isang matabang litsong manok, o 14 na tuhog ng barbecue, o isang kilong ubas. Pili kayo!
(Date Reviewed: 04 January 2007)
|
