Hingpit nang gipatuman atol ning piesta sa Diyosnong Kalooy karong adlawa ang bag-ong assignment sa kaparian nga ilang gidawat sa arsobispo dungan sa ilang pagbag-o sa panaad sa Misa sa Krisma.

Pinaagi sa board of consultors ni Most Rev. Jesus A. Dosado, C.M., D.D. uban sa panaad sa kaparian sa pagsunod kanonay sa Arsobispo, gidawat sa kapari-an ang ilang bag-ong assignment ning local nga simbahan.

Si Mons. Emie Bienes subling gitudlo nga Vicario Heneral; si Fr. Marvin Osmeña mao usab ang Oeconomus; si Fr. Maximino Naron ang canon layer sa Diocese gitudlong Chancellor; si Fr. Ernest Colanag gitudlo sa DOPIM Bishops nga Spiritual Director sa St. Mary’s Theologate.

Sa paglahugay og mga parokya aron sa pag-alagad isip Kura Paroko agig abag sa arsobispo sulod sa unom ka tuig sa bag-o niining mga parokya. Gitudlo isip kora si Fr. Edward Tabada sa lungsod sa Sapang Dalaga; si Fr. Antonio Sagrado sa Baliangao; si Fr. Alfredo Malalis sa Calamba; si Fr. Illuminado Rojo sa Plaridel; si Fr. Zacarias Montefalcon sa Lopez Jaena; si Fr. Arnold Daplin sa Oroquieta City; si Fr. Rogelio Taguran sa bag-ong parokya sa Santa Crus, Talairon sakup sa siyudad sa Oroquieta; si Fr. Edgar Calog sa Aloran; si Fr. Pablito Arcaba sa Panaon; si Fr. Mario Magcanam sa Jimenez; si Fr. Henry Revil sa Tudela; si Fr. Boy Naron sa Clarin; si Fr. Edgar Canama sa bag-ong parokya sa Balaan nga Krus sa Gango, Ozamiz City; si Fr. Nestor Duhilag sa Sta. Teresita sa Bañadero, Ozamiz City; si Fr. Jinny Villamor sa Tabid, Ozamiz City; si Msgr. Emie Bienes sa bag-ong parokya sa Berhin sa Kalooy, Pangabuan, Tangub City; ug si Fr. Dodong Cuaresma sa lungsod sa Bonifacio.

Ang mga padre kura usab ang magdumala sa katolikong eskwelahan niadtong mga parokya nga adunay Parochial School.

Ang lungsod sa Sinacaban magpabiling gidumala sa pari nga Columbano samtang sa lungsod sa Don Victoriano sa pari nga Vincentian ug si Fr. Damien McKenna magpabilin sa Liloan, Bonifacio, Misamis Occidental.

Si Fr. Celestino "Dodong" Palma gitudlo isip assistant Parish Priest sa Oroquieta City samtang ang kaabag sa Arsobispo sa Cathedral mao sila si Fr. Eugene Rudinas; Fr. Marvin Osmeña; Fr. Lane Sereno ug si Fr. Timmy Ruben.

Si Fr. Zachy Montefalcon mao ang gitudlo nga bag-ong director sa Social Action; si Fr. Marvin Osmeña sa Liturgy; si Fr. Mario Magcanam sa Mission; si Fr. Arnold Daplin sa Family Life and Apostolate; si Fr. Victor Serino sa Youth; si Fr. Ernest Colanag sa Catechist; si Fr. Fred Malalis sa Vocation; si Fr. Timmy Ruben sa Health ug si Msgr Emie Bienes sa Clergy.

Si Arsobispo Dosado mismo ang nangonay sa pagdala uban sa pag-abag sa iyang mga katabang nga mga pari sa San Lorenzo Ruiz Parish nga nahimong Personal ug Teretorial Parish diin sakup sa teritoryo niini ang Bernad Sub Division ug ang teritoryo ilalom sa La Salle University.

Karong adlaw nga naatol sa piesta sa Diyosnong Kalooy mao ang unang adlaw nga magsa-ulog sa unang piesta sa ilang bag-ong mga parokya ang nahisgutang kaparian ning local nga simbahan.

LOPEZ JAENA, MisOc—Pito ka mga pinangita sa balaod ang nasikop sa managlahing operasyon ug dapit sa mga sakop sa kapolisan.

Ang maong pito ka mga suspetado nadakpan kini pinaagi sa warrant of arrest sa korte sa nagkadaiyang salaod nga iyang nahimo.

Nadakpan ang usa ka Alexander Boquia, 37 anyos ang pangidaron ug usa ka medical representative diin kasamtangan nga nagpuyo sa La Verna Subdivision, Buhangin ,Davao City.

Nadakpan kini sa panimalay sa iyang mga ginikanan sa Western Poblacion. Sibo sa police blotter nadakpan ang maong tawo gumikan sa paglapas niini sa section 3 (e) sa Republic Act 3019 kon Anti-Graft and Corrupt Practices Act. Adunay P40,000 nga piyansa nga gitugot ang korte alang sa iyang temporaryo nga kagawasan.

Sa Tangub City nadakpan ang usa ka Jerry Sumalpong, 40 anyos ang pangidaron, usa ka mag-uuma gumikan sa kasong frustrated murder.

Tulo ka mga batan-on ang nadakpan usab sa mga sakop sa kapolisan sa lungsod sa Aloran, Misamis Occidental gumikan sa kasong qualified theft nga gisang-at ngadto sa korte.

Ang mga nadakpan naila nga sila si jojo Castillion, 23 anyos ang pangidaron, ulitawo ug walay trabaho; nadakpan usab ang usa ka 17 anyos nga batan-on ug usa ka Jay Tual, 19 anyos ang pangidaron.

Sa Oroquieta City nadakpan sa mga tinugyanan sa balaod ang usa ka Sanisten Lumasag, alyas Estin, 24 anyos ang pangidaron gumikan sa gipasaka nga kaso batok niini nga frustrated murder.

Samtang sa Baliangao, Misamis Occidental nadakpan ang usa ka Alejandro Eman, 28 anyos ang pangidaron gumikan sa kasong child abuse. Adunay gitugot nga piyansa ang korte nga P80,000 alang sa iyang temporaryo nga kagawasan.(Marilyn Toriba)

MITAMBONG sila si Misamis Occidental Governor Loreto Leo Ocampos, 2^nd District Representative Herminia Ramiro, Ozamiz City Mayor Reynaldo Parojinog ug Clarin Mayoralty candidate Seminarito ‘Semi’ Tagaloguin sa Lakas-CMD National Convention nga gipahigayon sa Folk Arts Theater, CCP Complex, Roxas Boulevard, Pasay City niadtong Abril 2.

Ang upat ka mga opisyal uban sa tanang lakas candidates sa Misamis Occidental miadto sa kaulohan isip tubag sa imbitasyon ni President Gloria Macapagal Arroyo sa pagtambong sa nasangpit nga convention.

Ang upat ka mga Lakas leaders sa probinsiya mipaasdang og hiniusang pagsuporta sa partido aron sa pagsiguro sa kadaugan sa ilang line up lakip na ang team unity senatorial candidates.

Lakip sa mitambong ang mga kandidato sa provincial board member Roland Romero, Carlou Zafra, Francisco Chiong, Jr., Tito decina, Sincaban Mayoralty candidate Dello Lood ug Mayors Nilo Ubot sa Tudela, Samson Dumanjug sa Bonifacio, Jennifer Tan sa Tangub City, Annable Hamoy sa Don Victorinao ug Vice Mayor Rudy Luna.

Ang maong convention gitambungan sa mokapin sa 10,000 ka mga sakop sa partidong Lakas.

Ang Lakas-CMD ang labing dako nga political party sa administrasyon nga adunay 84 ka mga representatives, 46 ka mga governors, 62 ka mga city mayors, 948 ka municipal mayors ug samang gidaghanon sa vice governors ug vice mayors sa siyudad ug lungsod.

Ang maong convention gipangunahan sa mga lakas officials : President Arroyo, Lakas Chairperson; former President Fidel Ramos, Lakas chairman Emiritus ug Speaker Jose De Venecia, Lakas National President.

Sa iyang kabahin gipadayag ni Lakas National executive director Raymundo Roquero nga ang Lakas-CMD isip maoy labing dako nga administration political party nga adunay 10,000 ka national ug local candidates sa national ug local elections nga naglangkob sa 60% sa mosubra sa 17,000 elective position.(PR)

NAKAKOMPISKA og 13 ka fruit game machines ug walo ka video karera machines ang mga sakop sa kapolisan sa Ozamiz atol sa ilang gilusad nga kampanya batok sa illegal nga sugal.

Nakuha ang maong mga makina sa illegal nga sugal sa 50^th District sa Ozamiz sa stalls nga wala usab masayri sa kapolisan kinsa ang tag-iya.

Nasayran nga ang milusad sa maong operasyon mao pinaagi usab sa mga sakop sa intelligence operatives apan wala nila mailhi ang tag-iya sa maong mga makina.

Samtang sa pikas bahin sa sulod sa Public Market Ozamiz City nasikop sa mga sakop sa kapolisan ang usa ka Marlon Cabrido, 25 anyos ang pangidaron ug nagpuyo sa Capistrano Street, Ozamiz City gumikan sa paghupot niini og tally sheet sa suwertres. (Marilyn Toriba)

UNOM ka mga tawo ang nadakpan atol sa gipahigayon nga buy bust operation sa mga sakop sa 911^th Provincial Mobile Group (PMG) ug ingon man sa Police Drug Enforcement Agency (PDEA) Region 10.

Ang buy bust operation gipahigayon sa ‘hide booth’ sa Barangay Santa Roque, Ozamiz City diin nadakpan ang unom ka mga tawo.

Ang mga nadakpan mao sila si Rodulfo Engracia, 39 anyos ang pangidaron, minyo ug residente sa Gomez Street Ozamiz City, nakuha sa iyang posisyon ang pito ka sachet sa shabu nga gisulod sa usa ka plastic nga sudlanan nga gibanabana nga .019 gramos ug ingon man ang marked money; nadakpan usab si Samuel Responso, 21 anyos, minyo ug lumolopyo sa barangay Tinago, Ozamiz City; Ninio Chico, 23 anyos ug nagpuyo sa Tinago, Ozamiz City; Reynaldo Chico, 29 anyos, ulitawo ug nagpuyo sa Tinago, Ozamiz City; Benjamin Semilya, 31 anyos, minyo ug lumolopyo sa Barangay Tinago ug Joefel Detalla, 20 anyos, minyo ug lumolopyo sa Malaubang, Ozamiz City.

Samtang sa samang bahin ang mga elemento sa kapolisan sa Ozamz City mipahigayon usab og usa ka buy bust operation sa Purok 3 Barangay San Roque nga miresulta sa pagkasikop sa usa ka Rey Jamago, 40 anyos ang pangidaron ug lumolopyo sa nasangpit nga dapit.

Nakuha sa iyang posisyon ang usa ka sachet sa shabu lakip na ang marked money.

Ang mga suspetsado ang giditini kini alang sa posible nga pagpasaka og kaso. (Marilyn Toriba)

TINGUHA ni Senatorial candidate Mike Tol Defensor nga ang tanang Filipino makabaton og desenting pamuyo.

Kini unya ang usa sa hatagan og pagtagad ni Tol Mike Defensor panahon nga makalingkod na siya sa senado human sa Mayo 14 nga bugnong lugaynon.

Gisaysay ni Defensor nga sa mga balaod unya nga iyang mugnaon nakasentro siya sa eksaktong pabalay sa matag Filipino.

Gidugang niini nga ang dignidad sa usa ka tawo nahasubay usab kini sa kaugalingon nga pinuy-anan. Hinungdan nga tinguha niya nga mahatagan og desenting pamuyo ang katawhan aron motaas usab ang dignidad sa matag-usa ug ang ubang mga kaayohan musonod na unya.

Tinguha usab niya nga matutokan sa iya na unya nga paglingkod ang backlog nga 4 million housing units sa tibuok nasud.

Nasayran nga usa na sa iyang kinauyukan nga tumong ang paghatag og pabalay sa katawhan sukad nga siya misulod sa public office.

Diin sa dihang napili siya nga representante sa 3^rd District sa Quezon City usa siya sa nangamahan sa sugyot balaodnon nga nagtukod sa Department og Housing and Urban Development.

Sa dihang nahimong presidente sa Gloria Macapagal Arroyo natudlo siya nga presidential adviser on housing ug kasamtangan karon nga chairman sa Housing and Urban Development Coordinating Council (HUDCC).

Kahinumduman migintang lamang og tulo ka adlaw nga nagsunod sila si Sorsogon 1^st District Congressman Francis Joseph ‘Chiz’ Escudero ug Defensor.

Managsama nga nakigtagbo sa mga sakop sa media sa Misamis Occidental ang duroha sa managlahing dapit.

Una nga midangat si Escudero sa lalawigan particular sa Ozamiz City niadtong Marso 22 diin misaka sa mga estasyonan sa Radyo ug nakigtagbo sa tanang mga sakop sa media sa Drewberry Coffeshop.

Si Defensor mibisita sa lalawigan particular sa Tangub City sa dihang siya ang gikuha nga guest speaker sa graduation ceremony sa Alfonso D. Tan College niadtong Marso 24.(NAB)s

Adunay panultihon nga nag-ingon: "Ang bakak kon balikbalikon sa pagpamatuod mahimong daw tinuod niadtong wala mahibalo sa kamatuoran.

Ang Iglesia ni Cristo nga gitukod ni Felix Manalo kaniadtong 1914 hugtanong nanghimakak nga dili si Manalo ang nagtukod sa ilang pundok.

Subay sa ilang opisyal nga magazine nga mao ang PASUGO, Enero 1964, p. 6, kini nag-ingon: "Sino ang tunay na nagtayo ng Iglesya ni Cristo na lumitaw sa Pilipinas noong 1914? Hindi ang kapatid na Manalo kundi ang Dios at si Cristo." Sumpaki kini sa nasulat sa PASUGO, Agosto-Septyembre 1964, p. 5, nga nagkanayon: "Kailan napatala sa Pamahalaan o narehistro ang Iglesya ni Cristo sa Pilipinas? Noong Hulyo 27, 1914. Tunay nga na sinasabi sa rehistro na si Kapatid na Felix Manalo ang nagtatag ng Iglesya ni Cristo."

Klaro nga si Felix Manalo gayud ang nagtukod sa ilang pundok ug dili si Cristo subay sa ila mismong pagpamatuod.

Gitudlo usab sa mga Ministro ni Manalo nga ang matuod nga iglesia maila pinaagi sa mga pagtulon-an niini nga dili gikan sa tawo kon dili gikan gayud sa Dios. Ang PASUGO, Nobyembre 1960, p. 26 nag-ingon: "Kaya’t paano makikilala ang sugo ng Dios at ang hindi sugo ng Dios: Sa aral makikilala ayon kay Jesus. Ang aral ng sugo ng Dios ay mula sa Dios, Ang mga aral ng hindi sugo ng Dios, ay mula lamang sa kanyang sarili."

Tungod niini ang mga Ministro ni Manalo miinsister nga walay kaugalingong pagtulon-an nga gitudlo si Manalo sanglit ang tanan nilang pagtulon-an gikan gayud kuno sa Dios. Ang PASUGO, Nobyembre 1959, p. 20 nagkanayon: "Kaninong aral ang itinuturo ng Iglesya ni Cristo? Aral ng Dios, ni Cristo at ng mga Apostol na nasusulat sa Banal na Kasulatan. Walang aral si Kapatid na Felix Manalo na kinatha mula sa kanyang sarili". Kini nagsumpaki sa gipagawas sa PASUGO, Mayo 1961, p. 4, nga nagkanayon: "At sino nga ba ang gumagawa ng mga leksiyong itinuturo ng mga ministro, maging sa mga pagsamba, mga doktrina o mga Propaganda? Ang Kapatid na Felix Manalo". Gidasonan kini sa PASUGO, Mayo 1963, p. 27, nga nag-ingon: "Kaya’t sa katuparan ng hula, ang lahat ng mga itinuturo ng mga Ministro ng Iglesya ni Cristo sa mga pagsamba, sa mga doktrina, sa mga pamamahayag sa gitna ng bayan, ay si Kapatid na Felix Manalo lamang ang bumabalangkas at nagtuturo sa kanila."

Niining tulo ka managlahing isyo sa ilang PASUGO Magazine atong naklaro nga dili gayud gikan sa Dios ang mga pagtulon-an nga gitudlo sa iglesia ni Manalo. Busa tin-aw nga si Manalo ang nanag-iya sa iglesia nga iyang gitukod sanglit nagagikan kaniya ang mga pagtulon-an nga gitudlo sa iyang mga Ministro. Ang PASUGO, Mayo 1952, p. 4 nagkanayon: "Kung ang babalingan ng pag-uusap ay ang nagtatag, dapat na siya ang may-ari ng itinatag, at sa kanya rin manggagaling ang mga aral at turo na ipinatutupad."

Ilang gipatin-aw nga usa lamang ang matuod nga iglesia ug dili tinuod ang iglesia nga mobangon. Ang PASUGO, Mayo 1968, p. 7 nag-ingon: "Ang tunay na Iglesya ni Cristo ay iisa lamang, ito ang Iglesyang itinayo ni Cristo. Kung mayroon mang nagsisibangon ngayong mga Iglesya at sasabihing sila man ay Iglesya ni Cristo rin ang mga ito ay hindi tunay kundi huwad lamang". Apan sa tin-aw ilang giangkon nga mibangon ang ilang iglesia. Ang PASUGO, Mayo 2003, p. 10 nagkanayon: "Ang Iglesya ni Cristo ay bumangon sa Pilipinas, …".

Niining duha ka managlahing isyo atong maklaro ang ilang pagpangangkon lang sa kamatuoran apan bisan pa niana mipatigbabaw pa gihapon ang tinuod.

Giingon sa Hukmanan nga ang tawong nag-usab-usab ug nagkabangi ang pamahayag klaro nga wala magtug-an sa kamatuoran. Mao kini ang nahitabo sa mga Ministro ni Manalo nga nagkabangi sa ilang pagpanudlo kon kanus-ang tuiga natukod ang Iglesia Katolika. Sa sulat ni Ben Santiago sa PASUGO, Mayo 1952, p. 5, kini nag-ingon: "Mula sa taong 527 hanggang 565, sa panahon ng Emperador Justiniano, naging ganap ang pagkatatag ng Iglesyang ito (Katoliko) na sumipot sa Pulong ng Nicea (Ika-anim na siglo)".

Apan migintang lang og pipila ka tuig nausab ang pagpamatuod ni Santiago sa katukoran sa iglesya Katolika. Ang PASUGO, Agosto 1962, p. 3, ni Ben Santiag, nagkanayon: "Sino ang nagtayo ng Iglesya Katolika Apostolika Romana? Ang Konsilyo Batikano! Kailan? Noong 1870".

Si Ministro Teofilo Ramos usab nag-ingon nga ang Katoliko gimugna lang sa mga Obispo sa Konsilyo Batikano kaniadtong 1870. Ang PASUGO, Marso 1956, p. 25, kini nag-ingon: "Ang Iglesya Katoliko’y pinabrika lamang ng mga Obispo noong 1870 sa Batikano".

Laing bersyon usab ang pagpamatuod ni Ministro Joaquin Balmores sa katukoran sa Simbahang Katoliko, subay sa gisulat ni Balmores sa PASUGO, Pebrero 1952, p. 9, siya nag-ingon: "Hindi mapapasinungalingan ninuman na talagang ang Iglesya Katolika ang lumitaw sa loob ng Emperyo Romano noong ika-apat na siglo".

Angayang masayran nga kining mga tawhana mao ang mga ministro ni Felix nga Manalo nga gitahasan sa pagmantala sa katukoran sa Santa Katolika Apostolika Romana apan tin-aw nga nagkabangi sila.

Mao kini ang nakat-unan ni Manalo nga managlahing tuig sa Katukoran sa Iglesia Katoliko nga iyang gitudlo sa iyang mga ministro ug ila usab kining gipatik sa opisyal nilang magazine, ang Pasugo.

Busa ikaw nga nagpasakop sa maong pundok angayan nga magtuon sa inyong Pasugo Magazine aron imong masayran ang inyong nagkasumpaki nga pagtulon-an ug sa ingon mobalik kana sa sabakan sa inahan tang simbahan, ang Iglesya Katolika. m

      All the teachings in these pages are for the instruction of the faithful of the Particular Church in Misamis Occidental, Philippines
                       dosado@ozamiz.com