Si Papa Benedikto XVI ug ang mga Pusil-pusil nga mga Dulaan sa mga Bata

Niadtong miaging Domingo si Papa Benedikto XVI midayeg sa mga paningkamot pagdili nga makabaton ang mga bata og mga dulaan sama sa mga pusil-pusil.

Sa iyang naandan nga pamulong gikan sa iyang bentana nga nag-ambo sa Plaza ni San Pedro iyang ginganlan ang usa ka pundok gikan sa habagatang bahin sa Italia nga nanganpanya sa usa ka kalihokan nga nailhan nga "Change to Play."

Miingon ang Santo Papa mahitungod niining maong pundok "Gidapit nila ang mga bata paglabay sa ilang mga dulaan nga mga pusil-pusil. Ako sila nga pahalipayan tungod niining maong pasiugda ug buot nako palapdan ang pag-awhag: atong ipabilin ang pagkabata nga dili katakdan sa violence!"

Kon mahinumdoman sa iyang Misa sa Tungang Gabii sa Pasko sa iyang homiliya miawhag sa mga matuuhon paglihok alang sa pagtahod sa kahalangdon sa mga bata, ug naguol siya nga ang mga bata sa pipila ka mga dapit sa kalibotan gipugos nga mahimong mga sundalo.

Ang pasiugda sa Change the Game nagsugod didto sa Dakbayan sa Leece, Italia, diha pagpangampanya pagdis-arm sa bata sa ilang mga dulaan nga violent.

Inubanan sa mga pangamhanan sa Leece, si Vito Patti, nga nailhan nga ang Salamangkero nga si Fracasso, mi-organisar og usa ka bulan nga "disarmament" nga natapos sa Pangilin sa Tulo ka Hari nga naandan sa Italia ug sa España nga adlaw sa pagpanghatag sa mga pinaskohan.

Sa iyang pribado nga pagkigkita kang Papa Benedikto XVI gihatagan ni Salamangkero Fracasso og napulo ug duha ka mga dulaan nga mga pusil-pusil nga iyang nahipos sa ilang pangampanya.