ANG DAKONG JUBILEO SA TUIG 2000

Ang Ikatulo nga Kaliboan nga Katuigan sa Kasaysayan magsugod sa tuig 2000. Giproklamar kini sa Santo Papa isip Ang Dakong Jubileo sa Tuig 2000 (THE GREAT JUBILEE OF THE YEAR 2000).

Ug nagsugò siya nga pagasaulugon kini uban sa dako nga solemnidad.

Ang pagsaulog sa Dakong Jubileo sa Tuig 2000 nagtanyag sa tibuok simbahan ug usa ka talagsaong kahigayonan sa mapasalamaton nga paghandom ug pagsaulog Pagkahimong Tawo sa Anak sa Dios (Incarnation).

Ang iyang pagkatawo maoy gigamit aron sa pag-ihap sa katuigan. Sa ingon niini paganganlan ang tuig nga Tuig sa Ginoo. Sa Tuig 2000 pagahandumon nato ang pagkatawo sa Ginoo didto sa Bethlehem may mga duha ka libo ka tuig kanhi.

Ang pagsaulog sa Dakong Jubileo sa Tuig 2000 ug ang mga pangandam alang niini nagsentro gayod sa nahitabo nga maluwasnon nga Pagkahimong Tawo sa Anak sa Dios.

Ang pagsaulog sa Dakong Jubileo sa Tuig 2000 dili lamang mao ang paghinumdom sa usa ka butang nga nahitabo kaniadto; usa kini ka paghandom ug sa paghimo nga kadongan nato karon sa porma nga sakramental ang Pagkahimong Tawo sa Anak sa Dios, sa iyang Kamatayon ug Pagkabanhaw.

Ang mga Simbahanong Katilingban gidapit sa Santo Papa sa pagbasa pag-usab inubanan sa gugma sa Pulong sa Dios, sa halawom pa nga pagpamalandong sa nagkalainlaing mga aspeto sa pagpanamkon ug pagkatawo sa Anak sa Dios. Kini mao ang gitanyag sa Simbahan matag tuig diha sa liturhiya sa Pasko.

Tulo ka punto ang angay pamalandongan mahitungod sa Pagkatawo sa Ginoo.

1. Kinahanglan ilhon nato diha sa Batang Jesús ang pagkaanaa sa Dios uban kanato: ang pagkatawo ni Cristo nagpadayag sa iyang pangandoy sa pag-uban sa atong pagpanaw ug sa pagtukod sa iyang tolda sa atong taliwala. Sa tanang kapanahonan siya ang Emmanuel, ang Dios uban kanato.

2. Kinahanglan ilhon nato diha sa Batang Jesús ang Dios nga sama kanato. Ang pagkahimong Tawo sa Anak sa Dios nagpakita sa dako nga gugma sa Dios, sa iyang pagpunit sa napukan nga katawhan ug pagpahimo sa iyang kaugalingon nga sama gayod kanato sa tanang butang gawas lamang sa salâ.

3. Kinahanglan ilhon nato diha sa Batang Jesús ang pagkaalang kanato sa Dios. Ang pagkatawo ni Cristo nagpakita sa misteryo sa usa ka Dios nga nidukô aron pagkab-ot sa nahulog nga katawhan aron sa pagtubos ug pagluwas niini. Ang Anak sa Dios nahimong tawo ug misul-ob ug lawas ug kalag diha sa sabakan sa Birhen aron gayod mamahimong tiunay nga makaluwas nga sakripisyo.

Ang pagkatawo ni Cristo mao ang katumanan sa mga saad sa Dios ngadto sa katawhan sa Israel, kinsa mao ang gitahasan sa pagka katawhan sa paglaum sulod sa kapid-an ka gatosan ka katuigan.

Sa samang higayon si Cristo mao ang katumanan sa mga labaw ka natago nga mga pangandoy sa kapid-an ka mga relihiyon sa tibuok kalibotan diha sa ilang pagpangita sa Dios. Ug sa ingon niini si Cristo mao ang usa ra ug wala nay lain nga kinapon-an sa tanang relihiyon.