MGA PAAGI SA PAGPANGANDAM ALANG SA JUBILEO SA TUIG 2000

Niining tungora atong ilakbit-saysay ang mga gishisgotan ug ubanan nato ug mga pangutana alang sa pamalandong sa mga simbahanong mga pundok: mga parokya, mga GSK, mga organisayon, mga movements, ug uban pa.

Ang Dakong Jubileo sa Tuig 2000 mao ang paghandom sa Pagkahimong Tawo sa Dios nga nianang tuiga may mga duha ka libo ka tuig na ang nangagi.

Unsaon man nato pagpadangat sa katawhan niining atong kapanahonan karon sa usa ka gibag-o nga pagsinati unsa ka dako sa gugma sa Dios nga gipadayag diha sa Pagkahimong Tawo sa iyang Anak?

Unsa man ang mga paagi nga makaabot ang grasya ug kalipay sa Pagkahimong Tawo sa Anak sa Dios ngadto sa mga lihok nga pastoral sa atong mga simbahanong mga pundok?

Unsa may konkretong mga lakang ang atong pagahimuon aron ang katawhan dinha sa atong katilingban taliwala sa nagkalainlain nilang mga kultura makasabot ug makasinati sa nahitabo may mga duha na ka libo ka tuig karon nga mao ang Pagkahimong Tawo sa Dios ug sa nagpadayon nga makaluwas nga epekto niini?

Ang Jubileo naghandom sa katumanan diha ni Cristo sa mga pangandoy sa katawhan. Mga pangandoy sa kahusay ug kalinaw, sa kalingkawasan ug kagawasan, sa kalipay ug grasya, sa kaluwasan.

Unsa man ang mga pangandoy sa katawhan sa atong kapanahonan karon?

Unsa man ang mga paagi nga atong magamit aron ang katawhan makaamgo sa mga tinuod nga mga pangandoy sa katawhan nga gihatagan ug katumanan dinha sa mga pagsaulog sa mga Jubileo?

Ang dagkong mga hisgutanan kon mga tema sa Jubileo mao kining mga mosunod: pasalamat sa pagkabalaan ug sa pagkaibabaw sa tanan sa Dios, proklamasyon sa pagkamanagsuon ug pagkasama ra sa tanan, paghandom sa paskohanong kalingkawasan, pagsinati nga kita nagapanaw ngadto sa tiunay natong yuta nga sinaad.

Unsa man ang mga paagi nga kining mga tema sa Jubileo motumaw sa kinabuhi ug mga buhat nga pastoral sa atong mga simbahanong mga katilingban?

Unsa may mga paagi nga makit-an, maamgohan, masinati ug mabati sa atong katawhan kining maong mga tema dinha sa atong mga pagsimba, pagwali, katekesis, ug uban pang mga simbahanong mga buhat?

Daghan ang mga paagi nga gisugyot aron sa pagpangandam alang sa Dakong Jubileo sa Tuig 2000 ug sa kinabuhi sa simbahan sa sunod nga kaliboan ka katuigan. Gihatagan ug dakong pagkamhinungdanon ang mga pag-umol.

Unsaon man nato pag-umol sa katawhan diha sa nagkalainlaing mga lakang sa ebanghelisasyon ug katekesis aron magbaton sila ug mapasalamaton ug malipayon nga pagtuo?

Unsaon man nato pagdala sa Maayong Balita sa Pagkahimong Tawo sa Anak sa Dios ngadto sa mga nabunyagan na apan nakalimot o wala lang magpakabanâ niini?

Unsaon man nato pagpalambo sa mga pagdasig ug mga misyonero aron maabot ang proklamasyon sa Ebangheolyo sa tanang katawhan sa kalibotan?

Dinha sa atong mga lihok pastoral unsa may mga paagi nga mahibalik ang kaamgohan sa pagkakinahanglan sa kombersiyon, sa kalipay nga masinati dinha sa sakramentohanong pagpasaylo, ug sa pakighiuli?

Unsa man ang mga dinalian nga mga himuonon dinha sa Diosesis, sa mga parokya, sa mga Gagmayng Simbahanong Katilaingban, sa mga banay, sa nagkalainlaing mga pundok ug kalihokan?

Unsa man ang mga espirituhanong mga mithi ug diwa ang gikinahanglan pag-ayo nga palambuon dinha sa atong katawhan karon, ilabi na sa atong mga batan-on?

Unsa may mga paagi nga atong gamiton aron mahatagan ug hustong pagpakabana ang papel ni Maria dinha sa binag-o ug gibag-o nga pagsabwag sa Ebanghelyo ug dinha sa hiniusang pagpanaw sa mga matuuhon ngadto sa gipangandoy nga pinuy-anan?