Kumalabinsiam a Simba na Ordinarin Panaon

Tinaon taon say Pilipinas so bibisitaen na labinsiam ya anggad duamplo tan lima ya bagyo. Kanian, pamilyar tayo no panon makaderal iray kasil na dagem tan uran ya awit na sarayan bagyo.

Kabat tayo si Typhoon Gading, si Typhoon Feria. Typhoon Yoling. Agaylay kasi da irayan bagyo! Nen sinmabi si Typhoon Yoyong nen inbeneg ya taon, agaylay takot ko. Manpiyoos so dagem to. Tan diad kakasil nen Yoyong, say amtak nalakasan lay atep na konbento! Diad takot ko ag ak makaogip! Anggad siak so nandasal tan say kuanko: “Jesus I trust in you!” Nakal so takot. Nakal so panaburidok. Tan siak so akaogip diad kapegleyan na kasil nen Typhoon Yoyong. Ta lapud nalmok ed say Katawan a Dios so biskeg na ilalok tan talek na pananisiak ed say panangasi na Dios!

Bagyo tan angkakabaleg a daluyon so nangelena tayo ed say ibanghilyo tayo natan. Saramay disipulo nen Kristo ya akalogan ed baloto so natatakot ira ta lapud asabian iray bagyo diad pegley na dayat. Natatakot irad bilay da. Natatakot irad bagyo. Natatakot ira lapud agda kaiba si Jesus diad saman a kapegleyan a bagyo. Pinaona to lara nen Jesus. Tinmilak. “Una kayo la ontumbok ak,” inkuan nen Jesus. Kanian nen sinmabi so maksil a dagem tan angkakabaleg a daluyon, masyadoy takot da.

Insan sinmabi si Jesus ya manaakar ed danum. Anggaman antoy kabaleg na daluyon tan kakasil na dagem, si Jesus sinarag to so manakar ni ed danum. INpanengneng to so pakapanyari to ed sarayan bagyo. Si Pedro ya akabirbir ed si Jesus so tinmaboy. Labay to met so onakar ed danum a singa si Jesus. Balet, diad kabaleg na daluyon, sikato so ataktakot lamet, tan sikato la so nalelegep. Sikato so inmeyag ya nanpikasi, “Katawan, ilaban mo ak!” Inyunat nen Jesus so lima tan ginoyor toy Pedro. “Akin et nanduarua ka?” tepet ne Jesus.

Agagik ira ed Kristo, say bagyo na bilay so agtan naekal tan nabalang. Amin tayo so nabibisita na sarayan bagyon mangiiter na takot tan gonigon. Tan ontan la so panpipikasi tayo ed say Dios a Katawan.

“Katawan, ilaban mo kami ed saray kairapan mi”.
“Katawan, ilaban mo kami ed saray problema mi”.
“Katawan, ilaban mo kami ed saray sakisakit mi.”

Ilaban mo kami ta natatakot kami.

No nengnengen tayo so nagagawa ed bansa tayo, ontan la so paga tan pangogonigon tayo. Tan say pakatatakot tayo.

“Katawan, ilaban mo kami ed saray irirap na bansa mi.”
“Katawan, ilaban mo kami ed saray takewan, pateyan, tilaan diad kaliber-liber mi”.
“Katawan, ilaban mo kami ed say politikan manederal na kareenan tan aliguas na bilay mi”.

Ta natatakot kami.

Ontan la ya nalegep tayo no anggapod sikatayo si Kristo. No say amta tayo et pinaolyan to itayo la ed sarayan bagyo na bilay tayo. Balet say tua, si Jesus so makapanyari ed amin. Makapanyanri nen say sankakasilian a bagyo. Makapanyari ni nen say sankabalegan a daluyon!

Nalegep tayo no iyarawi tayo so puso tan matay pananisia tayo ed sikato. Ontakot tayo no anggapoy pananisia tayon si Jesus so makapanyarin amin tan nasarag ton patundaen irayan bagyo ed bilay tayo tan say bilay na bansa tayo.

Itila manpikasi. Manmatalek ed si Jesus tan ikuan tayo: “Katawan, ilaban mo kami!”

Ontan la komon.