Daid interview na saray man-apply ya mankasal, wala ray pigaran tetepeten mi pian naneng-neng mi no natatalusan na saray mankasal nipaakar ed say sakraminto, ontan met no akaparaan laran mankasal tan manbilay ya walay asawa tan pamilya. Akin et labay mo la so mankasal so sakey ya tepet. Say mabetbet ya ebat: ta manaarowan kami la. Panon mon nipaneng-neng ya inarom iyay asawaen mo? "I love you", kuan kon lanang, so ebat na arum.
Mainomay so mangibagay "I love you!". Balet panon ya nipanengneng iyan nibalikas ya panangaro? Kada walay inbalikas ya " I love you", walay kabaliksan to ya ed bilay tayo tan bilay na inararo tayo. Ta say panangaro ag mansasampot ed salita labat.
"No inaro yo ak, onuren yo ray ganggan ko.", inkuan na Katawan tayon Jesukristo ed saray disipulo to. Wala sirin so nepeg ya gawaen tayo lapud panangaro.
Nen imbaga nen Jesus, "No inaro yo ak", walay ilalo to ed sikatayo ya unoren tayo so ganggan to! Anggapoy kabaliksan na panangaro na sayan salitan "love" o panangaro no anggapoy kabaliksan to ed bilay na mangaaro tan aaroen.
Singa bilbilang, saray ateng so mangaaro ed saray anak da. Iiter da so nakaukolan da. Say abong ya panayaman da, say kanen ya manpabiskeg ed sikara, say edukasyon tan say kawes da. Ontan met ya wadtan iran lanang ya mangaantabay ed saray anak da. Ipaneng-neng da so nepeg ya gawaen da. Walay panaon ya manpasanok ira no sananey la so natuturobos na anak da. Sirin, anggapoy kabaliksan no imbagay ateng ed saray anak da, "I love you", balet paulyan da ra labat tan anggapo so pibabali dan balot ed sikara. Antoy kabaliksan to yan panangaro no ag iyan balot naneng-neng so bilay tan petang to?
Ontan met ed saray anak. No nibalikas day "I love you" ed ateng da, walan tampol so kabaliksan to ya ed sikara. Ta say panangaro et birbiren to so responsibilidad to ed say aaroen to. Kanian, no say anak et agto as-asikasoen so panag-aral ton iiter na saray ateng to, agto susumpalen iray ganggan na ateng to para say panakamungan to, agto tuan inaro so ateng to. "I love you" labat ed salita. Anggapoy kabaliksan to lanlamang.
"No inaro ya ak, onuren yo ray ganggan ko". Lapud sayan salita nen Jesus, naamtaan tayo la sirin so rason no akin et tumboken tayo ra so ganggan na Dios. Say samploran ganggan na Dios. Wadtan iran kabat tayo iraya. Balet, akin kasi et agaylay irap ya unoren ira. Ompano nalilingwanan tayo la so rason no akin et nepeg ya unoren irayan ganggan na Dios.
Sarayan ganggan et tuan mangipaneng-neng no panon tayon aroen so Dios tan aray kapara tayo. Mairap ya tumboken. Balet aliwan imposible. Ta anggapoy imposible ed say panangaro tayod say Dios a Katawan tayo. No, manduaruwa tayo sirin no akin et unoren irayan ganggan, tepeten tayo ed dili tayo no bilbilang et sumlangen na sakey irayan ganggan tan sikatayo biktima, labay tayo kasin nagawa iya? No sikatayo so takewan, tilaan, pateyen. Labay tayo kas?. Balet, no sikatayo so mantila ed arum. Takewan so arum. Sakitan so arum. Ok labat?
Diad panuonor tayo na ganggan na Dios et ipapaneng-neng tayo so panangaro tayod Dios. Ontan met so pangipapanengneng tayo'y panangaro tayod kapara tayo. Ta lapud say panuonor tayod ganggan na Dios lapud panangarod Sikato, onbobulaslas tan onbibiskeg so pananisia tayo. Growth of our faith comes with the obedience we give to God's commandments. Anggan agtayo tumboken tan onoren so ganggan na Dios, panon tayon nibagan inaro tayo so Dios? Tan panon tayon nibagan sakey tayon disipulo nen Kristo?
"No inaro ya ak, onuren yo ray ganggan ko" Say ibabaga nen Jesus ed saya, arawian tayo ra so kasalanan. Mairap, balet aliwan imposible. Ta say kasalanan so tandan papasakitan tayo so Dios tayo. Ta lapud, agtayo iiter ed Sikato so nepeg ya panangaron iter tayo ed Sikato diad say agtayo panonor ed saray ganggan na Dios a Katawan.
Diad sampot say bunga na sayan panonor tan panangaro ed say pikasakey tayo ed say Ama tayo. Onya so sipan nen Jesus ed sikatayo: "Aroen na Amak so toon mangarod siak; sikatoy aroen ko met tan ipaamtak so inkasiak ed sikato."
Ontan la komon.
