Say title na sankaunaan ya encyclical nen Pope Benedict XVI et "Deus est Caritas". Say Dios so panangaro. Unong ed si Pope Benedict, say panangaro so walad pegley tan utel na bilay, tan mission na Simbaan. Tan say simbaan so sarag ton mangaro lapud say Dios a panangaro mismo et sikato so inmunan angaro ed sikatayo.

 

"No panoy panangaroy Ama ed siak, ontan met so panangarok ed sikayo". Anto tan panon itayo inaro na Katawan tayon Jesukristo? No amtaan tayo ya, naonor tayo matwaa so ganggan to ed sikatayo: "Saya sirin so ganggan kod sikayo: manaarowan kayo".

 

Unaan, say twan panangaro nen Jesus et panangaro ya walay sakripisyo. Sayan panangaro so aliwan masiblet. Aro ya maliket ya mangiter ya amin para say inararo. Kanian, diad panangaro nen Jesus, mabolos ton inter so amin para sikatayo: anggad say bilay to! Say tanda na sankabalgan ya panangaro, inkuan na Katawan, et say sipaparaan tan mabolos ya isaklang so bilay to para saray kakaaro to!

 

Kumadwa, say twan panangaro nen Jesus et panangaro ya mabli! Agaylay inkabli to lapud say inpangipaneng-neng na sayan panangaro et nen iter so sankarakepan, tan sankablian para say inararo. Say sankablian ya inter na Ama pian nipaneng-neng to so panangaro to et say bogbogtong ya Anak to! Say inararon Anak so sankablian lan amin! Balet lapud panangaro, ontan lan insaklang na Anak so inkasikato para sikatayo!

 

Anto tan panon tayo inaro na Katawan? Panangaro ya walay sakripisyo. Panangaro ya agay lay inkabli!

 

Onya met sirin so pangaro tayo ed balang sakey no twan onoren tan tumboken tayo so ganggan na Katawan.

 

Unaan, aralen tayo so mangaro ya walay sakripisyo. Say masiblet ya aro, aliwan twan panangaro, anggapoy sakripisyo. No masiblet tayo na oras tan panaon ed say inararo tayo, kawalaay sakripisyo ed satan? No masblet tayo ed pitotong-tong tan pitotoyaw ed sikara, kawalaay sakrispisyo ed satan? No masiblet tayo ed say materyal tan spiritual ya bengatla ed sikara, kawalaay sakripisyo ed satan?

 

Kumadwa, say panangaro nen Jesus et agaylay inkabli. Kanian, no mangaro tayo, ontan met ya say iter tayo para say inararo tayo et say sankamablian! Aliwan peke. Aliwan imitation. Aliwan bontok. Aliwan kera-kera. No walay isaklang tayo ed say Dios, aliwan kera-kera tan aliwan bontok. No mangaro tayo komon, say puso tan linawa tayo et ami-amin para say inararo tayo. Say the BEST so mabolos tayon iter. Sirin say puso tayon walay sinsiridan, katwaan, katunongan, kareenan. Puso tan bilay ya mapangasi tan manamerdona!

 

Komon say ganggan na Katawan so twa tan mabolos tayon onoren. Tan sikatayo so manaarowan unong ed say inpangaro nen Jesus ed sikatayo. Walay sakripisyo. Agaylay inkabli ya panangaro.

 

Ontan la komon.