Kumaliman Simba

Nen naamtan nen Jesus ya inatey si Lazaro ya inararo ton kaaro, tan nen aneng-neng to no panoy panangis da di Maria tan si Marta ed say inpatey nen agi ra, "nannangis si Jesus". Kanian say kuan na saray Judio ya akeneng-neng ed si Jesus ya tinmerter so lua to, "Agaylay panangaro tod kinen Lazaro!" Alikna nen Jesus so ermen na saramay san-agi; alikna nen Jesus no panon so panangaro dad say agi ra ya naandi lad bilay. Kanian, si Jesus so nanakis. Say inpanangis nen Jesus et  lapud kaermenan.  Sikato so nan-ermen lapud say bunga na say kasalanan na too et patey ed saray amin ya pinalsa na Dios ed sayan mundo. Balet sayan inpanter-ter na lua to et walay ilalo: Sikato lan lamang so manpasimbalo na bilay na amin. Si Jesus so bilay tan kiolid bilay tayo. Say inpanakis nen Jesus et lapud say panangaro nen Jesus ed sikatayo ran makasalanan, say lua to ed para  sikatayo rad wala nid silong na kabilongetan ya walad aripen ni na kabilongetan a singa si Lazaro ya walad kabilongetan na patey ya apat-agew. Sikatayo balet so manaalagar na sinag na liwawa na bilay na Katawan pian diad sampot sikatayo so napasimbalo tan onolid bilay ed grasya tan panangasi na Katawan!

Manbibilay tayo natan ed sarayan panaon a singa wala tayod silong na kabilongetan na patey. Lapud saya, si Jesus so mannangis ed sarayan panaon. Walay lua na Katawan a para sikatayo lapud manpapateyan, itayo dakerakel la so abortion, giyera tan kipapatey ya anggapoy kabaliksan. Mannangis si Jesus ed say Kultura na Patey ya onkakayat diad idarakel na suicide, say panag-abuso na droga tan say alcohol, say kakulangan na panag-asikaso na laman tayo. Mannangis si Jesus lapud banbantayan tayo labat iray arum ya ompapatey ed kairapan, eras tan malnutrition, anggapoy abong tan trabaho. Dakerakel ya ogogaw so ag la ondaragod eskwelaan. Say panag-abuso tayo na kalikasan tan dederalen tan dudutaken tayo ray kaliber-liber tayo.

Mannangis si Jesus et Kultura na Tila ya onbibiskeg ed kapegleyan tayo, diad saray pamilya, trabaho tan anggad gobierno. Diad panag-usar na pakapanyari imbes ya para say pankamaungan na karaklan et nanausar para say pig-pigara labat. Mannagis si Jesus lapud say mabetbet tan ondarakel ya ompapatey et say mangibabaga na katwaan, manbibilay unong ed katunongan, onlalaban ed kaugsan. Mannangis si Jesus ed sikatayon ran onaabuloy ed amin ed saraya lapud say takot, tan say agtayo pibabali.

Sayan akis na Katawan balet et lua ya walay ilalo. Si Jesus so kiolid bilay tan sikato so bilay tayo. Si Jesus so Dios ya mangiter na biskeg ed say kamarerwa tayo pian sikatayo so nabilay, pian sikatayo so manbilay ed sinag na liwawa na bilay, katwaan tan kareenan To. Ed sayan panaon na Kuaresma, agtayo komon lingwanan ya say pasion na Katawan et mansampot ed say kiolid bilay. Say patey tinalo na bilay -- say kiolid bilay. Ontan pa komon. Amen.