Biernes Santo

Nangel tayo so ondakey ya istorya nipaakar ed say Passion na Katawan tayon Jesukristo, odino say inpanirap na Katawan. Tan diad sayan inpanirap na Katawan, aliwa labat so panangaro tan panangasi na Dios so akabatan tan naawat tayo. Say sakey ed saray misteryo na pananisia tayo, tan say misterio na panangaro na Dios so naimatonan tayo. Anto ya? Diad say inpansisiplat na saray sondalo ed say Katawan, diad saray inpanludlurey da, diad inpansakbat toy ambelat a krus tan diad aminpiga-piga inkapasag to, diad inpangipasak ed krus ya anggad inpatey na Katawan, alikna to so kairapan na laman tan say kamarewa. Tan alikna na amin iraya lapud si Jesus, a Dios et mabolos a nagmaliw a too! Too a singa sikatayo; too ya walay liknaan. Amta to so kairapan na too.; alikna irayan amin na Katawan.

No anto sirin so kairapan ya alikna tan nalilikna tayo, nanirapan met na Katawan. No anto kaman ya kaugsan tan kairapan ya onsasabid sikatayo lapud pakaandi na katunongan o hustisia, si Jesus et sinakbat to la ra. Anto kaman ya kaermenan lapud panbokbokor tayo, si Jesus diad tagey na krus et alikna to so sanka-aralman ya panbokbokor. Si Jesus so nagmaliw a too tan sikato so nanayam ed mundo. Si Jesus nan-irap lapud say kasalanan na too. Kasalanan na mundo. "Lamb of God who takes away the sin of the world!" so pananisia tayo. Si Jesus so Kordero ya manaandi kasalanan na mundo!

Ed sayan Biernes Santo, say pakanudnunotan na inpanirap na Katawan, agtayo lingwanan ya say Dios et nagmaliw a too. Si Jesus so walad sikatayon amin tan nagmaliw ya amin para sikatayo ran totoon pinalsa na Dios. Si Jesus so sakey ya sumisigay; sikato so sakey ya dumaralos. Sakey ya businessman, o managlako. Sakey ya politiko tan sakey ya ina. Sakey ya ama, tan sakey ya anak. Sikato so walad pakapanyari; sikato so walad kairapan. Si Jesus so mansasakit.  Si Jesus so nagmaliw a too ed kultura na mundo. Si Jesus so sakey ya ogaw; sakey ya masiken. Sakey ya teen-ager.

Say sankaermenan ya nagagawad sikatayo natan et say pakalilingwanan tayo ya si Jesus a Dios so nagmaliw a too, tan nanayam ed kapegleyan tayo. Tan wadia ingen ed sayan pantitipon tan ulopan tayo. "No antokaman so ginawam ed say sankamelagan ed saray agagik, ginawam ed siak!" Diad tagey na krus onya so inyeyag na Katawan: "Dios ko, Dios ko! Akin et inkaindan mo ak!" Sakey ya pikakasi na Katawan ed say Ama to. Sakey met ya pikakasi na Katawan ed bosis tayon amin. Bosis tayo met so narerengel tayon mangibabaga: "Akin et inkaindan yo ak!" Balet, amta tayo ya agtayo inkaindan na Ama a Dios tayo; no ingen sikatayo ra mismo so manunaan ya nankaindan ed kapara tayo. Diad panbubulag-bulagan, pan-emel-emelan, say panpiley-pileyan tayo pian labat et napili tayo no siopa tan kapigan tayo ipaneng-neng ya sikatayo et disipulo nen Kristo. No kapigan tayo tan siopa so aroen tayo! Diad say pantitila tan pansasaol tayo mismo; diad pan-aabuloy tayon say tila tan inka-agom so manuley ed bilay tayo; diad pana-alagar tayo labat ya say arum so ongalaw pian napaekal so kaugsan. Sikatayo so mangipapasak ed Katawan lamet; sikatayo so mamapariap lamet ed say Katawan. Sikatayo so nan-kaindan ed si Jesus ya agi tayo diad panpapaolyan tayod say kipapasen na agagi tayo, say baley tayo, say bansa tayo!

Si Jesus so nanirap ed krus, duan libon taon la so apalabas. Anggad natan papairapen tayo si Kristo. "Tama na, itama na natin" ang mga masasamang ginagawa natin sa ating kapwa at bayan at sa ating Panginoong Jesukristo". Ontan pa komon. Amen.