"Siak so mabilay a tinapay a linmeksab a nanlapud tawen. Mambilay ya andi-angga so siopaman a mangan ed sayan tinapay." Nakaukolan tayo so kanen pian sikatayo so nabilay. No anggapo so kanen, anggapo so bilay; sikatayo so ompatey. Kanian, no maminsan, no walay sakey ya mataba so laman to, kuan tayon tampol, "Agay lay abig na bilay to!" Balet, diad sarayan panaon, a-diskubre na siyensia ya aliwan lapud sikatayo so mamangan et maabig la so laman tayo, tan ondokey so bilay tayo la. Aliwan diad karakel na kakanen manaya mandepende so kalidad na abig na laman. Nakaukolan ya say kakanen tayo et maong ya klase. No mabetbet tayon mangan na baboy tan taba, kanding tan loob-looban, anggaman agaylay samit daraya, makapoy met manaya irad sikatayo. Mansakit tayo na hypertension, diabetes, rheumatism tan arum nira. Pianm, andokey tan maabig so bilay, aliwan karakel na kakanen tayo so imanoen, bambalet say kamaong tan masustansian kakanen.

Nen inbaga nen Jesus ya sikato so mabilay a tinapay, aliwan ordinarion kanen so iiter tod sikatayo. No ingen sakey ya mabilay a tinapay ya makapangiter na andi-anggaan ya bilay! Tinapay ya mabilay, tan bilay ya andi-anggaan. Si Jesus so bilay tan manlapud sikato so bilay tayo.

Duara so kabaliksan ya ibabaga nen Jesus ed sayan maandon bilay o eternal life. Unaan, saya et nipaakar ed bilay ya anggapoy pansampotan to. Walay gapo, balet anggapo "ending" to. Eternal life: life without end. Kumadwa, say kalidad na bilay. Eternal life here means an intimate experience of love and unity with God. Sakey ya experiensia tayo na panangaro tan pikakasakey ed Kristo. Tan saya et walad sikatayo no akoen tayo si Jesus ed holy communion.  Say Fiesta na Corpus Christi, odino say Masagradon Laman tan Dala nen Kristo et pangipapanunot ed sikatayo no siopa so aawaten tayo diad masanton communion. Si Jesus, a Dios tan Manangilaban tayo. Tan sayan tinapay a mabilay ya aakoen tayo so mangiter na ilalo, tan biskeg ed kapegleyen na kairapan tan saray nanduroman pagpaga tayo.

Diad sayan apalabas a bagyo lanti, dakerakel so "maling akala" tayo. Ya no maminsan, say amta tayo no anggapo raya et anggapo so kakanaan na bilay tayo. Say amta tayo, agtayo  sarag so manbilay ya anggapoy kuryente. Sarag tayo met manaya. Say amta tayo agtayo sarag ya naogip ed ambasan dukolan tan danganan. Sarag tayo met manaya. Say amta tayo, anggapo lay kwentay bilay no anggapo la so abong tayo, odino say atep na abong tayo et alakasan. Andi manaya. Sarag tayo so nalakasan na abong, tan saragen tayon apigeren irayan adera-deral nen "Cosme" a sakey ya konsomesyon.  Balet, agtayo sarag so manbilay ya anggapoy Dios ya kaiba tayo, tan Dios ya mangantabay ed sikatayo. Agtayo sarag so manbilay a peteg ya agtayo naaako so Katawan ed masanton komonyon. No anggapo so Katawan ya mangiter na biskeg tan bilay ed sikatayo. Nayarin, naandi iray kureyente, abong, nabasa so kawes tan nabalang iray kayaryan tayo. Balet, agnepeg ya nabalang tan naandi ed bilay tayo so kiwawala na Katawan. Tan diad masanton komonyon, say pangako tayo ed say Laman na Katawan, sayan kiwawala na Dios so mansiansia ed sikatayo. Misalamat tayo ed say Dios et sayan sankabalgan a pribelihio ya inter na Dios ed sikatayo. Ontan pa komon. Amen.