Nen sikatayo so abiyagan walay dasal na pari para sikatayo. Sayaman so "Prayer of Exorcism". Diad sayan dasal, say pari so manpipikasi para sikatayo. Onya so dasal: " Makapanyari tan maandon Dios, imbakin so bogtong ya Anak mo ed mundo pian paekalen mo so pakapanyari nen Satanas, say ispirito na kaugsan, tan ilaban mo so too ed panarian na kabilongetan, tan awiten mo ed gloriam diad panarian na liwawam. Ipikasi mi rayan nabinyagan: paandien mo pad sikara so kasalanan a tawir, pagmaliw mo ran timplo na glorain tan ibakim so Ispirot Santo a manayam ed sikata".Diad sayan dasal, say kasalanan a tawir (orginal sin) so naandi ed samay abinyagan, tan say nansayakop la et say Ispirito Santo ya pinagmaliw ton timplo na gloria na Dios. Lapud binyag sirin, sikatayo so nagmaliw a timplo na Ispirito Santo, say Isprito so nagnap ya walad sikatayo, say kiwawala na Dios so walad sikatayo ran abinyagan. Natan, kasumpal na pigaran taon, kasumpal na 65 years, odnio 80 years o 20  o 30 years, kumustaen tayo la so kipapasen na "Timplo na Ispirito Santo" a sikatayo man nen sikatayo so abinyagan?

Diad say unaan a babasaen, indalatdat nen Moises ed saray Israelitas so samploran ganggan a nanlapud Dios. Sarayan ganggan met so pagmaliwen tayon pakaneng-nengan no anto la so kipapasen na "Timplo na Ispirito Santo" ya nawaat tayo nen sikatayo so abinyagan. Ta say peteg, no walay anggan sakey  ya sinumlang tayo ed sayan ganggan, singa nalolopok tan natataboney so "Timplo na Ispirito" ed say sikatayo. Tan amta tayo met, tan biribiren tayon sipapa-ebaba ya nen kasumpal tayon abinyagan, tan sikato so tinmakken la, ontan met ya mas napapaolyan tayon tooren irayan samploran ganggan na Dios. Kanian, makabaliksan para sikatayo natan ed sayan panaon na kuaresma so istorya na say ibanghilyon abasa natan. nanpasnok si Jesus! Nen nilinisan nen Jesus so Timplo na Jerusalem. Anengneng nen Jesus so kaugsan ya gagawaen na saray Judio ed abong na Ama to. nanpasnok ed arayan kaugan. Nanggaway siplat ya lobir insan so pinapaekal iray totoo tan saray lako ra. Walay kaugsan ya abirbir na Katawan, tan sayan kaugsan, pinaekal tan nilinisan to so Timplo.

Onya met so tawag na Katawan ed sikatayo, No kumustaen tayo so "Timplo na Ispirito Santo" tayo, tan say samploran ganggan so panbasian tayo, sipapa-abeba tayon awaten ya nepeg ya abuloyan tayo so Katawan ya manggaway siplat ya lobir, tan linisan to so kapusoan tan kamarerwa tayo ed sarayan kaugsan tan kasalanan ya mangiiter na samal ed bilay tayo tan bilayl na kamarerwa tayo tan saray kakaabay tayo. Nepeg met sirin ya walay pasnok tayo a singa say inpasanok nen Jesus ed arap na kaugsan. Nakaukolan ya walay pasnok tayo pian ag la onkayat tan onbaleg irayan kaugasan. No andi, aliling toy palpaolyan tayo iray kaugsan tan kasalanan ya manari ed say "Timplo" tayo. Singa bilbilang, susumlangen tayo so unaan a ganggan no diad panagpalar tayo manmamatalek nipaakar ed say bilay tayo. Susumlangen tayo so kumadwan ganggan no mabetbet so ayew tan panaglabir tayo ed say Dios tan say Simbaan to. Mankakasalanan tayo ed say kamatlon ganggan no agtayo asasikasoen so panag-dasal tayo tan say pimimisa tayo kada simba. No agtayo la italtalek iray ateng tayo. No agtayo la asikasoen so saray mansasakit. No mansisikot tayo, Ilabir-labir tayo ray arum. Maiimon tayo. Maagom tayo la. Say pasnok ed sarayan kaugasan ya nagagawa tayo so nepeg labay lapud say Dios tan say ganggan to so susumlangen tayo. tan inararo tayo so Dios. Lapud saya, say tawag na Dios ed sikatayo et tawag na panagbabawi, benegan so kasalanan, tan arapen so Katawan. Onya so panag-linis ya kekerewen na Dios ed siktayo ed sayan kuaresma.

Tan itila ed Sakramento na Panangasi na Dios, say kumpisar. Walay biskeg tayon nalinisan so Timplo tayo lapud manmamatalek tayo ed say panangasi na Dios:anggapoy kasalanan ya agnapirdona na Panangasi na Dios no onla itayon onkerew na sayan panangasi. Say toon ag manmatalek ed say Panangasi na Dios, agto naawat so panangsi na Dios; no baleg so talek tayo, anggaman peteg tan tua tayon makasalanan, say Dios linisan to Timplo tayo unong ed say Panangasi to. Ontan la komon. Amen.