"Kaselek na agew, inyakar na saray totoo ed kinen Jesus iray amin a mansasakit". Diad sayan Ibanghilyo, nangelan tayo so nanduroman mansasakit, saray maniirap ya inaawit dad say Katawan. Manunaan lad tan so katulangan nen Pedro ya mangi-inagem. Lapud saya, labay kon motekteken tayo ed sayan simba so mabetbet ya tepet balet ag met naeebatan. Sakey ya misterio ed bilay na too. Sakey ya mairap ya natalusan unong ed say kakabatan na Dios. Say misterio tan kabaliksan na kairapan na too.

Unaan, sikatayo so pinalsa na Dios ya walad liket ya andi-anggaan a kaiba so Katawan. Agitayo pinalsa na Dios ya manirap. Anggaman natan nanaimatonan tayo so baleg ya kairapan na mundo, aliwan saya so original na intention na Dios. Kanian, ontan lan say dakerakel so pinapa-abig na Katawan ed saramay manasasakit ya inyakar dad Sikato.  Ag itayo pinalsa na Dios ya manirap. Kumadwa, sarayan kairapan so wadia ra lapud kasalanan. Say bunga na kasalanan na too et kairapan. Lapud sinumlang na too so linawa na Dios, lapud kaugsan, sikatayo so maniirap. Tan lapud sikatayon amin so managkasalanan, say kairapan so kaiba na panbibilay tayo ed sayan mundo. Say kaugsan et mankadua: say kaugsan ya gagawaen tayo tan kaugsan ya gagawaen na arum ed sikatayo. Diad sarayan dua, say bunga et kairapan. No sikatayo so mabisyo tan nansakit tayo, kairapan iya a nanlapud kaugsan ya gagawaen tayo. No sikatayo so pinoniti, a black-eye tayo, sakey yan kairapan ya nanlapud kaugsan na arum. Kumatlo, amin tayo, anggapo so exception, so makalikna tan makabet na kairapan. Tan unong ed say pananisia tayo, sarayan kairapan et CROSS iran nepeg ya sakbaten tayo. Si Kristo so oliran tayo. Anggapo so maka-escape ed sayan cross. Amin tayo walay cross ya sakbaten tayo ya onsabi at some point in our life. A singa, say say sakit na inararod bilay odino no walay naandid bilay ed pamilya tayo Balet, anggaman wala ra irayan cross ed bilay tayo, say Dios et iter tod sikatayo so grasya pian nasarag tan nayarian tayon akoen tan sakbaten iraya. Anggapoy cross ya agtayo nasarag ya nasakbat lapud say iter na Dios so grasyan nakaukolan tayo.

Anto sirin so gawaen tayo no wala irayan kairapan ed bilay tayo? Nipaakar ed saray kairapan a manlalapud kaugsan na arum, walay sarag tayon gawaen ni. No walay naneneng ya kaugsan, erepen iya, odino labanan so kaugsan. Say ilalo tayo et mantalongaring so kamaungan, say katonongan tan say pankakasakey. Ag nayari ya palpaolyan tayo ya manirapa so bansa tayo lapud corruption. Ag met nayari ya abuloyan tayon sikatayo so takawen, lames-lamesen tan ipireg-pireg ed saray kanepegan tayo a totoo na bansa tayo.

Panon balet a sakbaten so cross na kairapan tayo, manlalapud arum man o manlalapud dili odino kairapan ya anggapoy nagawaan tayo? Panon tayon awaten irayan kairapan? Komon, tumboken tayo so oliran na Katawan. Say kairapan to so nagmaliw ya cross to. No kairapan labat, mairap ya awaten. No kairapan a nagmaliw a cross, makabaliksan, magmaliw ya sobol na grasay ingen, tan kinasanto tayo. Say kairapan no magmaliw a cross, nepeg a nakaukolan toy pananisia. Say panagmatalek ed say Dios. Wala may sakey ya bulag ya nen tinepetan da no akin et ed sikaran sana-agi sikato labat so ag makanengneng, say ebat to et apano na panagmatalek ed say Dios. Say kuanto: "Ta lapud siguro amta na Dios ya sarag kon sakbaten iyan cross nen saray agagik." Manmatalek tayod Dios. Ag tayo nabatikan so cross tayo, balet, lapud say grasya na Dios, sarayan cross tayo et onlemey, magmaliw a instrumento na kilalaban tayo. Say Dios agto itayo met paolyan. Diad sarayan crosses tayo, komon, mas naalmo tayo so biskeg na Dios, tan say panangasi na Dios ed bilay tayo. Ontan pa komon. Amen