“Natad sayan agew inekal kod sikayo so kababaingan yo lapud impakaaripen yod Egipto.” Saya so inbalikas nen Yahweh ed saray apilin totooy Dios, saray Israelitas, nen sikara la so aksabi ed say Insipan na Dios a pasen ya panayaman da kasumpal ya sikara so tinmaynan ed say inka-aripen dad Egipto. Nen sikara so nanliber-liber ed desierto o kalawakan ya apataploy tayon , sikara so tuan pakaskasi, balet ag ira kaskasian. Ta lapud say kaiba ra et say Dios a Katawan, tan diad say Dios a Katawan nalmo da so biskeg, say dignidad tan say inawa da a sakey ya bansa.

Ontan met so mensahe na say istorya nen Jesus nipaakar ed samay Parable na Prodigal Son. Say agnsabsabaan tan agnatukor a panangasi na Dios. Tua asabi so ponto ya samay bolirek so pakaskasi, balet say panangasi na Ama to so angiter na biskeg, dignidad tan inawa ed sikato. Inakal na say Ama so kababaingan na saman ya bolirek, tan inako to lamet a sakey ya anak tan kabiangan na pammilya to. Pakaskasi balet aliwan kaskasian. Ta wadman so Ama ton manangaro!

Ontan lan say panangasi na Ama tayod tawen so sankabalgan ya regalo to ed sikatayo ran anak to. Agtayo komon pirdien tan daraken iyan grasya na Dios ed bilay tayo. Tua sikatayo so pakaskasi lapud say kairapan tan kaermenan ya walad kapegleyan tayo. Agitayo balet komon kaskasian lapud sarayan kipapasen tayo. Ta say tua walad say inter na Dios ed sikatayo so pakapanyarin manpili no anto tan panon tayon ilaban so aliguas, tan say kaoksoyan na bilay tayo tan say bansa tayo.

Walad sankaabigan ya komon say napili tayo ed sayan arapen ya eleksyon et saray totoon angkop para say office ya getma da. Say Simbaan so pangipapalapag na saray qualities ya anapen tayo ed sarayan kandidato. Tan duara iraya: totoon walay INTEGRITY tan COMPETENCE.

Unaan, walay integridad na sakey ya too no sikato so MAKA-DIOS. Aliwan lapud sikato so mabetbet ed dalem na simbaan, no ingen naalmo ed sikato so panangaro ed say Dios tan say kapara ton too. Walad sikato so takot ed say Dios. Ta say toon angto antakot so Dios, anggapo la so takotan to. Kanian, nayarian to gawaen so labay ton gawaen ya anggapo takot tan konsiensa.

Sikato so walay HONESTY. Say ibabaga to tan say gagawaen to et saksakey. Wala kasi so respeto tan panbirbir to ed saray kanepegan tayo? Walad sikato so moral ya panagbilay: diad personal tan diad pikakasakey tod arum. Kanian say tepet: wala ra so bisyo ton makaderal na pankamaongan na karaklan? Sikato kasi so involve tan konektado ed saray illegal ya gawa? No say ebat et ON ed saraya, arawi ed sikato so bilay ya walad katapatan, honesty tan integrity. Ontan met: kumusta so commitment to ed say pamilya to? Say kuan nen Archbishop Oscar Cruz ed samay interview ed Philippine Daily Inquirer: Agyo pipilien so kandidaton dakerakel so laki tan bii to. Ta lapud walad sikato so kakulangan ya commitment to ed saray sipan ya inter to ed publiko. Tan diad sampot: manalwar ed saray kandidato ya walay taloran "G": guns, goons tan gold. Walay palteg ya uusaren na saray goons to tan kuartan agnasabsabaan ya anggad iner ed uusaren.

Competence o Kakayahan. Walad sikato kasi so pakatalus ed say responsibilidad to. Wala kasi so pakatalus to ed saray problema na bansa o baley tan wala kasi akaparaan ya solusyon para say pankamaungan na karaklan.

Integrity TAN competence. Ag nayari ya wala may sakey et anggapo so sakey.

Say Dios sanka-abigan, sankamapangasian. Iiter tod sikatayo so dignidad tan pakapanyari ya nausar tayo pian onaliguas tan naoksoy tayo so kipapasen tayo. Agtayo komon iraya daraken tan deralen a singa inpan-darak na samay bolirek ed samay Prodigal Son. “Natad sayan agew inekal kod sikayo so kababaingan yo lapud impakaaripen yo". Agtayo komon manbilay ed kababaingan no ingen diad gayaga tan kaabigan na Katawan lapud agtayo dinarak iray grasyan inter na Dios ed sikatayo. Amen.