"Manaaroan kayo." (John 13,34)

 

Inaraok iran agagik, pinablik iran kalangweran:

 

Kasumpal na panangarod Dios, say panangarod kapara so sankaimportantian ya ganggan ya inter nen Kristo ed sikatayo. Kabat nen Kristo ya anggad agtayo manaaroan, sikatayo so mansiansian walad kairapan, gotgotan tan bosolan. Diad aro, sikatayo so mankakasakey, sikatayo so magayagan sakey ya komunidad.

 

Makabaliksan ya diad sarayan panaon na say arapen ya Panamili ed sayan Mayo ya nunutan tayo so kabaliksan na say bunga na sakey ya boto tayo ed sayan eleksyon unong ed say ganggan nen Kristo ya manaaroan tayo.

 

Say tua et say sakey ya boto na sakey ya too et agto labat naapektoan so dilin bilay to no ingen pati say bilay tan say arapen a bilay na say pamilya to tan saray arum. Sirin, say boto para say corrupt, matila tan anggapoy pakasarag to et boto para say kaugsan na arum a totoo. Balet, say boto para say walay integridad tan kakayahan ya kandidato ed papaboran to so dakerakel.

 

Kanian, onya so kabaliksan sirin na sakey ya boto tayo -- no saya et mangiter na kaabigan o kaugsan ed karaklan et mandepende no say apili et maong o mauges ya kandidato. Kanian, agtayo lilingwanan so sarayan naaralan tayo ed sayan arapen ya panamili:

Unaan: Sumlang ed ganggan na panangaro ed kapara no iboto so kabat lan ag makanan kandidato.

Kumadwa: Sumlang ed ganggan na panangaro ed kapara so mangilako na say boto  para sakey ya kandidato.

Kumatlo: Sumlang ed ganggan na panangaro ed kapara so ag manboton balot so sakey ya sarag tan nepeg ya manboto.

Diad sayan arapen ya 14 Mayo, ipapaneng tayo so panangaro tayod kapara tayo diad panboto tayo,  diad panagpabli tayod boto tayo, tan diad panboto tayo ed saray kandidaton walay integridad tan kakayahan.

 

Say bendision na Dios so walad sikatayon amin komon!

 

(SGD)+ Oscar V.Cruz, DD

Arsobispo

5 Mayo 2007